Read სბს–სტოკჰოლმი 2001 ფსალმუნები 55 Bible Online

ფსალმუნები 55 - სბს–სტოკჰოლმი 2001 bible

ფსალმუნები 55

¹გუნდის ლოტბარს. “მტრედზე, რომელიც მდუმარებს შორეთში.” დავითის ძეგლისწერა, როცა ფილისტიმელებმა შეიპყრეს იგი გათში. შემიწყალე, ღმერთო, რადგან გათელვას მიპირებს კაცი, ყოველდღე მავიწროებს მოშუღარი.

²ჩანთქმას მითქვამენ ჩემი მტრები ყოველდღიურად, რადგან მრავალი მეომება მაღლით.

³საშიშროების დღეს შენ მოგენდობი.

⁴ღმერთში ვადიდებ მისსავე სიტყვას, ღმერთზე ვარ მინდობილი და არ მეშინია, რას მიზამს ხორციელი?

⁵ყოველდღე ამახინჯებს ჩემს სიტყვებს; ბოროტია ყოველი მათი ზრახვა ჩემს მომართ.

⁶გროვდებიან, მისაფრდებიან ისინი - ჩემი მდევრები, ჩემს ნაკვალევს უთვალთვალებენ, თითქოსდა ჩემს სულს ელოდებიან.

⁷ნუთუ ამ სიმრუდეს უნდა გადაურჩნენ? რისხვით დაამხე ერები, ღმერთო!

⁸ჩემი ხეტიალი გამოთვლილი გაქვს; შენს ჭურჭელში მოათავსე ჩემი ცრემლები! განა შენს წიგნში არ არიან ისინი?

⁹მაშინ უკუიქცევიან ჩემი მტრები, რა დღესაც მოგიხმობ; ეს ვიცი, რომ ღმერთი ჩემთან არის.

¹⁰ღმერთის მიერ შევაქებ სიტყვას, უფლის მიერ შევაქებ სიტყვას.

¹¹ღმერთს მივენდე - არ მეშინია; რას მიზამს კაცი?

¹²ჩემზეა, ღმერთო, ჩემი აღთქმები, შენ რომ აღგითქვი; დიდებას მოგიზღავ შენ.

¹³რამეთუ იხსენი ჩემი სული სიკვდილისაგან, ჩემი ფეხი - წაბორძიკებისაგან, რათა ვიარო ღმერთის წინაშე სიცოცხლის შუქით.