Read სბს–სტოკჰოლმი 2001 ფსალმუნები 56 Bible Online

ფსალმუნები 56 - სბს–სტოკჰოლმი 2001 bible

ფსალმუნები 56

¹გუნდის ლოტბარს. “ნუ მოსპობ”. დავითის ძეგლისწერა, როცა საულს გაექცა მღვიმეში. შემიწყალე, ღმერთო, შემიწყალე, რადგან შენ მოგენდო ჩემი სული, და შენი ფრთების ჩრდილქვეშ შევაფარებ თავს, ვიდრე გაჭირვება გადაივლიდეს.

²მოვუხმობ უზენაეს ღმერთს, ღმერთს, რომელიც თავის ნებას აღასრულებს ჩემზე.

³გამომიგზავნის ციდან ხსნას, შეარცხვენს ჩემი გათელვის მსურველს. გამომიგზავნის ღმერთი თავის წყალობას და ჭეშმარიტებას.

⁴ჩემი სული ლომების შუაგულშია; ვწევარ ცეცხლის ალში, ადამის ძეთა შორის ვცხოვრობ, რომელთა კბილები მშვილდ-ისრებია და ენა - ბასრი მახვილი.

⁵ამაღლდი ცათა ზემოთ, ღმერთო; მთელ დედამიწაზეა შენი დიდება.

⁶ბადე გაამზადეს ჩემთა ფერხთათვის; ჩემი სული მოიდრიკა; ჩემს წინ ორმო გათხარეს, თვითონ ჩაცვივდნენ შიგ.

⁷წრფელია ჩემი გული, ღმერთო, წრფელია ჩემი გული, გიმღერებ და გიგალობებ.

⁸გამოიღვიძე, დიდებავ ჩემო, გამოაღვიძე ჩანგი და ქნარი; გამოვიღვიძებ ცისკართან ერთად.

⁹განგადიდებ ხალხებში, უფალო, გიგალობებ ერებში.

¹⁰რადგან დიდია, ზეცამდეა შენი წყალობა, და ღრუბლებამდე - შენი ჭეშმარიტება.

¹¹ამაღლდი ცათა ზემოთ, ღმერთო; მთელს დედამიწაზეა შენი დიდება.