Read სბს–სტოკჰოლმი 2001 ფსალმუნები 62 Bible Online

ფსალმუნები 62 - სბს–სტოკჰოლმი 2001 bible

ფსალმუნები 62

¹ფსალმუნი დავითისა, იუდას უდაბნოში ყოფნის დროს. ღმერთო, შენ ხარ ჩემი ღმერთი; ცისკრის ჟამიდან გეძებ, მოსწყურდი ჩემს სულს, შენზე ნაღვლობს ჩემი ხორცი უკაცრიელ და გამოფიტულ, უწყლო მიწაზე;

²როგორც გიხილე საწმიდარში; რათა მენახა სიძლიერე და პატიოსნება შენი.

³რადგან სიცოცხლეზე მეტია შენი წყალობა; ჩემი ბაგენი გაქებენ შენ.

⁴ამიტომ გადიდებ ჩემი სიცოცხლის მანძილზე, შენი სახელით აღვაპყრობ ხელებს.

⁵ცხიმითა და სიმსუქნით დამსუყდება სული ჩემი, და მგალობელი ბაგეებით გაქებს პირი ჩემი.

⁶როცა გიხსენებ ჩემს სარეცელზე, მთელ ღამეებს ვიფიქრებ შენზე;

⁷რადგან იყავი დამხმარე ჩემი, შენს ფრთათა ჩრდილქვეშ მოვილხენ.

⁸შენ მოგტმასნია სული ჩემი; ჩემი საყრდენია მარჯვენა შენი.

⁹ხოლო ისინი, ვინც ჩემი სულის დაღუპვას ეძებენ, შავეთში ჩავლენ!

¹⁰მახვილის წერა გახდებიან, ტურების კერძი შეიქმნებიან!

¹¹მეფე კი გაიხარებს, ღმერთში; იქება ყველა, ვინც მას ფიცავს, ხოლო დაიგმანება სიცრუის მოლაპარკეთა პირი.