Read სბს–სტოკჰოლმი 2001 ფსალმუნები 67 Bible Online

ფსალმუნები 67 - სბს–სტოკჰოლმი 2001 bible

ფსალმუნები 67

¹გუნდის ლოტბარს. დავითისა. ფსალმუნი საგალობელისა. აღდგეს ღმერთი, რომ განიბნენ მისი მტრები, და მისი მოძულენი უკუიქცნენ მისგან.

²როგორც კვამლი გაიფანტება, ისე გაფანტე; როგორც ცვილი დადნება ცეცხლზე, ისე დაიღუპებიან ბოროტნი ღმერთის სახის წინაშე.

³ხოლო მართალნი გაიხარებენ და მოილხენენ ღმერთის წინაშე, და სიხარულით იზეიმებენ.

⁴აქეთ ღმერთი, უგალობეთ მის სახელს! გზა მოუმზადეთ მას, ვინც უდაბნოებს სერავს; უფალია მისი სახელი; ილხინეთ მის წინაშე.

⁵იგია მამა ობოლთა და მსაჯული ქვრივთა, ღმერთი, მის საწმიდარში რომ დაივანებს;

⁶ღმერთი, რომელიც ბინას აძლევს ეულებს, გამოჰყავს ტყვეები შესაფერის დროს, ხოლო ურჩნი ხრიოკზე რჩებიან.

⁷ღმერთო, როცა შენი ერის წინაშე გამოხვედი, როცა ფეხი დადგი უდაბნოში,

⁸დედამიწა შეირყა, ცანიც კი წვეთავდნენ ღმერთის სახის წინაშე; ეს სინაიც - ღმერთის წინაშე, ისრაელის ღმერთისა.

⁹ბარაქიანი წვიმა აწვიმე, ღმერთო, შენს სამკვიდროს, და თუ დაუძლურდება, შენ გაამაგრებ.

¹⁰შენმა ოჯახმა იქ ჰპოვა ბინა, რომელიც შენი სიკეთით განუმზადე ღარიბს, ღმერთო.

¹¹უფალი იძლევა სიტყვას მახარობელთა, დიდი გუნდია მახარობელ ქალთა!

¹²ჯარების მეფენი გარბიან, გარბიან, შინ მყოფი ქალი ნადავლს გაიყოფს.

¹³თუნდაც ცხვრის ბაკებში იწვეთ, მტრედის ფრთებს ვერცხლით დაფარულს ჰგავხართ და მის ნაკრტენს მოოქროვილს.

¹⁴როცა ყოვლისშემძლე გაფანტავს მეფეებს იქ, დათოვლავს ცალმონს.

¹⁵ბაშანის მთა - მთა ღმერთისა, ბაშანის მთა - მრავალმწვერვალიანი მთა.

¹⁶რატომ შეჰყურებთ შურით, მწვერვალებით მდიდარო მთებო, მთას, რომელიც ღმერთმა ისურვა თავის სამოსახლოდ, და უფალი დაიმკვიდრებს სამუდამოდ?

¹⁷ღმერთის ეტლები უთვალავია, და ათასეულები; მათ შორის არის უფალი სინაიზე, წმიდაში.

¹⁸შენ ახვედი მაღლა, დააბრუნე ტყვე, წამოიღე ძღვენი კაცთათვის, და ურჩებთანაც დაისადგურა უფალმა ღმერთმა. .

¹⁹კურთხეულ არს უფალი! დღითი დღე ზრუნავს ჩვენზე, ღმერთი ჩვენი მშველელი.

²⁰ღმერთი არის ჩვენთვის ღმერთი მშველელი, და უფალი ღმერთის ხელში არის სიკვდილის გასაღები.

²¹მაგრამ ღმერთი თავს გაუჭეჭყავს თავის მტრებს, აჯაგრულ კეფას - დანაშაულის გზით მოსიარულეს.

²²თქვა უფალმა: “ბაშანიდან დავაბრუნებ; დავაბრუნებ ზღვის სიღრმეებიდან,

²³რათა ჩადგა შენი ფეხი მტრების სისხლში, როგორც შენი ძაღლები ჩაყოფენ შიგ თავიანთ ენას”;

²⁴ნახეს შენი სვლა, ღმერთო, სვლა ჩემი ღმერთისა, ჩემი მეფისა წმიდაში.

²⁵წინ წარდგნენ მგალობლები, უკან - მემუსიკენი, შუაში - მედაირე ქალწულები.

²⁶კრებულთა შორის ადიდეთ ღმერთი, უფალი წყაროდან ისრაელისა.

²⁷იქ ბენიამინი - უმრწემესი - წინ წახტა; იუდას მთავრებმა ქვები დაუშინეს, ზებულუნის მთავრებმა, ნაფთალის მთავრებმა.

²⁸შენმა ღმერთმა მოგაკუთვნა შენ ძალა, ღმერთო, განამტკიცე ის, რაც მოიმოქმედე ჩვენთვის.

²⁹შენი ტაძრის გამო, რომელიც იერუსალიმშია, საჩუქრებს მოგიტანენ მეფეები.

³⁰შერისხე მხეცი ლერწმოვანისა, ხარების ჯოგი ხბორებს შორის იმ ხალხისა, რომლებიც ტრაბახობენ ვერცხლის ზოდებით. მიმოფანტე ომის მოყვარული ერები.

³¹ამოვლენ მოციქულნი ეგვიპტიდან, ქუში გაუწოდებს ხელს.

³²ქვეყნიერების სამეფონო, უმღერეთ, უგალობეთ უფალს.

³³ამაღლებულს ძველთუძველეს ცათა ცაში! აჰა, ის გამოსცემს თავისი ხმით ძლიერების ხმას.

³⁴მიეცით სიძლიერე ღმერთს! მისი სიდიადე ისრაელზეა და მისი სიძლიერე - ღრუბლებში.

³⁵საოცარი ხარ, ღმერთო, შენს ტაძარში. ღმერთი ისრაელისა - ის აძლევს ძალასა და სიმაგრეს ხალხს; კურთხეულ არს ღმერთი!