Read სბს–სტოკჰოლმი 2001 ფსალმუნები 71 Bible Online

ფსალმუნები 71 - სბს–სტოკჰოლმი 2001 bible

ფსალმუნები 71

¹სოლომონისთვის. ღმერთო, შენი სამართალი მიეცი მეფეს, და შენი სიმართლე - მეფის ძეს.

²რათა მან გაასამართლოს შენი ერი სიმართლით, და შენი ღატაკნი - სამართლიანად.

³მოუტანონ მთებმა მშვიდობა ერს, და ბორცვებმა - სამართლიანობა.

⁴გაასამართლოს ერის ღატაკნი, იხსნას შვილი ღარიბისა და დაჩაგროს მჩაგვრელი.

⁵შენი შიში ექნებათ, ვიდრე მზე და მთვარეა, თაობიდან თაობამდე.

⁶იგი ჩამოვა, როგორც წვიმა შიშველ ველზე, როგორც წვეთები, მიწას რომ ალბობენ.

⁷მის დღეებში გაიფურჩქნება წმიდანი და გამრავლდება მშვიდობა, ვიდრე მთვარე არსებობს.

⁸და იბატონებს ზღვიდან ზღვამდე და მდინარიდან დედამიწის კიდემდე.

⁹მის წინაშე ქედს მოიდრეკენ უდაბნოს მცხოვრებნი, და მისი მტრები მიწა-მტვერს ალოკავენ.

¹⁰თარშიშისა და კუნძულთა მეფენი ხარკს მოუტანენ მას; შებასა და სებას მეფენი ძღვენს მოართმევენ.

¹¹და ყველა მეფე თაყვანსა სცემს მას, ყველა წარმართი დაემორჩილება.

¹²რადგანაც იხსნის ღარიბს, მღაღადებელს, და ღატაკს, რომელსაც არა ჰყავს შემწე.

¹³შეიწყნარებს დავრდომილსა და ღარიბს, და ღარიბთა სულებს დაიხსნის.

¹⁴ვერაგობისა და ძალადობისგან დაიხსნის მათ სულებს, და ძვირფასი იქნებაა მათი სისხლი მის თვალში.

¹⁵და იცოცხლებს, და მისცემენ შებას ოქროს, და ილოცებენ მისთვის მუდამ, ყოველდღე აკურთხებენ მას.

¹⁶იქნება სიუხვე პურისა დედამიწაზე, ლიბანივით ამაღლდეს ნაყოფი მისი;. და აყვავილდებიან ქალაქებში, როგორც ბალახი დედამიწაზე.

¹⁷მისი სახელი იქნება უკუნისამდე, ვიდრე მზე არსებობს, იბრწყინებს მისი სახელი, და იკურთხებიან მის მიერ ქვეყნიერების ყოველი ტომი, ყოველი ხალხი შენატრებს მას. 

¹⁸კურთხეულ არს უფალი, ღმერთი ისრაელისა, მარტოდ მოქმედი სასწაულისა!

¹⁹და კურთხეულ არს სახელი მისი დიდებისა უკუნისამდე, და აივსება მისი დიდებით ქვეყნიერება! ამინ, ამინ!

²⁰დამთავრდა ლოცვანი დავითისა, იესეს ძისა.