Read სბს–სტოკჰოლმი 2001 ფსალმუნები 75 Bible Online

ფსალმუნები 75 - სბს–სტოკჰოლმი 2001 bible

ფსალმუნები 75

¹გუნდის ლოტბარს. სიმებიან საკრავზე. ფსალმუნი ასაფისა. გალობა. ცნობილია იუდაში ღმერთი, ისრაელში დიდია მისი სახელი.

²და იყო შალემში მისი კარავი და მისი სავანე - სიონში.

³იქ შემუსრა მშვილდ-ისრები, ფარი და ხმალი, და ომი.

⁴ბრწყინვალე ხარ და ძლიერი სანადირო მთებზე მეტად.

⁵გაიძარცვნენ გულმაგრები, ჩათვლიმეს, დაეძინათ, მეომრებს ხელებმა უმტყუნეს.

⁶შენი შემოტევით, ღმერთო იაკობისა, რული მოერია ცხენსაც და მხედარსაც.

⁷შენ საშიში ხარ, და ვინ დაგიდგება წინ შენი განრისხების ჟამს?

⁸ციდან მოგვასმინე სამართალი, დედამიწა შეშინდა და მიწყნარდა,

⁹როცა აღდგა სამართლისათვის ღმერთი ქვეყნიერების ყველა ჩაგრულის გადასარჩენად.

¹⁰რაკი ადამიანის რისხვა იქცევა შენდა აღიარებად, რისხვის ნატამალს მოთოკავ.

¹¹აღუთქვით და გადაუხადეთ უფალს, თქვენს ღმერთს; ყველამ - მის ირგვლივ მყოფმა, საჩუქარი მიუძღვნას საშიშს.

¹²ის დაამდაბლებს მბრძანებელთა სულს, შიშის ზარს დასცემს ამქვეყნიურ მეფეებს.