Read სბს–სტოკჰოლმი 2001 ფსალმუნები 76 Bible Online

ფსალმუნები 76 - სბს–სტოკჰოლმი 2001 bible

ფსალმუნები 76

¹გუნდის ლოტბარს. იედუთუნისთვის. ასაფის ფსალმუნი. ჩემი ხმა ღმერთის მიმართ და მე შევღაღადებ; ჩემი ხმა ღმერთის მიმართ და ის მომისმენს.

²ჩემი გაჭირვების დღეს უფალს ვეძებ; ჩემი ხელი ღამღამობით გაწვდილია და არ ივანებს, უარს ამბობს ნუგეშისცემაზე ჩემი სული.

³გავიხსენებ ღმერთს და ვკვნესი, ვისაუბრებ და უძლურდება ჩემი სული.

⁴თვალი არ დამახუჭინე, შევძრწუნდი და ვეღარ ვლაპარაკობ.

⁵ვიგონებ ადრინდელ დღეებს, გარდასულ წლებს;

⁶გავიხსენებ ჩემს გალობას ღამღამობით, ჩემს გულთან ვისაუბრებ და განიცდის სული ჩემი:

⁷“ნუთუ საუკუნოდ მიმატოვებს უფალი და აღარასოდეს მომისურვებს?

⁸ნუთუ სამუდამოდ გაქრა მისი წყალობა, დამთავრდა მისი სიტყვა თაობიდან თაობამდე?

⁹ნუთუ დაივიწყა შებრალება ღმერთმა? ნუთუ რისხვით უარყო სიბრალული?”

¹⁰და ვთქვი: “აი, ჩემი უბედურება - შეცვლა უზენაესის მარჯვენისა.”

¹¹გავიხსენებ უფლის საქმეებს, რადგანაც მახსოვს შენი ძველი სასწაულები.

¹²ჩავუკვირდები ყველა შენს ნამოქმედარს და შენს საქმეებზე ვისაუბრებ.

¹³ღმერთო, წმიდაა შენი გზა! რომელი ღმერთია შენსავით დიდი?

¹⁴შენა ხარ ღმერთი სასწაულის მოქმედი; შენ გამოავლინე ერებზე ძლიერება შენი.

¹⁵შენი მკლავით დაიხსენი შენი ერი - ძენი იაკობისა და იოსებისა.

¹⁶როდესაც გიხილეს წყლებმა, ღმერთო, როდესაც გიხილეს წყლებმა, ახმაურდნენ, ზღვათა უფსკრულებიც კი შეძრწუნდნენ.

¹⁷გადმოღვარეს წყლები ღრუბლებმა, ხმა მოსცეს ცათა, შენი ისრებიც გაფრინდნენ.

¹⁸შენი გრგვინივის ხმა ცის თაღზე - გაანათეს ელვებმა სამყარო, შეძრწუნდა და შეირყა დედამიწა.

¹⁹ზღვაშია შენი გზა და შენი ბილიკი - დიდ მდინარეებში, და შენი კვალი არ არის ცნობილი.

²⁰უძღოდი, ვითარცა ფარას, შენს ხალხს მოსეს და აარონის ხელით.