Read სბს–სტოკჰოლმი 2001 ფსალმუნები 78 Bible Online

ფსალმუნები 78 - სბს–სტოკჰოლმი 2001 bible

ფსალმუნები 78

¹ფსალმუნი ასაფისა. ღმერთო, ხალხები მოვიდნენ შენს სამკვიდრებელში; შებილწეს შენი წმიდა ტაძარი, იერუსალიმი ნანგრევებად აქციეს.

²მისცეს შენი მორჩილების მძორი საჯიჯგნად ცის ფრინველებს, შენთა წმიდათა სხეულები - მიწის ნადირებს.

³დაღვარეს სისხლი მათი წყალივით იერუსალიმის გარშემო, და დამმარხავი არავინაა.

⁴სალანძღავი გავხდით ჩვენი მეზობლებისათვის, მასხარად ასაგდები და დასაცინი - ჩვენს ირგვლივ მყოფთათვის.

⁵როდემდე იქნები, უფალო, მუდმივად განრისხებული? და იგიზგიზებს შური შენი, ვითარცა ცეცხლი?

⁶გადმოღვარე შენი რისხვა იმ ხალხებზე, შენ რომ არ გიცნობენ, და იმ სამეფოებზე, შენს სახელს რომ არ შეჰღაღადებენ.

⁷რადგან შეჭამეს იაკობი და მისი სადგომი გააპარტახეს.

⁸ნუ გაგვიხსენებ წინაპართა ცოდვებს; მალე შეგვეგებოს წინ შენი წყალობა, რადგან მეტისმეტად დავჩაჩანაკდით.

⁹დაგვეხმარე, ღმერთო ჩვენო მხსნელო, შენი სახელის ღირსებისათვის, გადაგვარჩინე და შეგვინდე ჩვენი ცოდვები შენი სახელის გულისათვის.

¹⁰რატომ უნდა თქვან ხალხებმა: “სად არის ახლა მათი ღმერთი?” ცნობილი გახდეს წარმართთა შორის, ჩვენს თვალწინ, შურისძიება შენს მორჩილთა დაღვრილი სისხლისა.

¹¹მოაღწიოს შენამდე ტუსაღის კვნესამ, შენი მკლავის სიძლიერით შეეწიე სასიკვდილოდ განწირულ შვილებს.

¹²დაუბრუნე ჩვენს მეზობლებს შვიდმაგად მათ წიაღში ის დამცირება, შენ რომ გამცირებდნენ, უფალო.

¹³ხოლო ჩვენ - შენი ხალხი და შენი სამწყსოს ცხვარი - გაქებთ მარადჟამს; თაობიდან თაობას მოვუთხრობთ შენს დიდებას.