Read სბს–სტოკჰოლმი 2001 ფსალმუნები 82 Bible Online

ფსალმუნები 82 - სბს–სტოკჰოლმი 2001 bible

ფსალმუნები 82

¹გალობა. ფსალმუნი ასაფისა. ღმერთო, ნუ დადუმდები, ყურს ნუ მოიყრუებ და ნუ დამშვიდდები!

²რადგან აჰა, შენი მტრები ხმაურობენ, და შენმა მოძულეებმა თავი წამოყვეს.

³შენი ერის საწინააღმდეგოდ მზაკვრობენ საიდუმლოდ და თათბირობენ მათზე, ვისაც შენ იფარავ.

⁴თქვეს: “მოდით, ამოვძირკვოთ ისინი, როგორც ერი და აღარ იხსენიებოდეს სახელი ისრაელისა.”

⁵მოითათბირეს ერთსულოვნად, შენს წინააღმდეგ შეკრეს პირობა;

⁶ედომელთა ბანაკებმა და ისმაელიანებმა, მოაბმა და აგარის ნაშიერმა;

⁷გებალმა, ყამონმა და ყამალეკმა, ფილისტინელებმა ცორელებთან ერთად.

⁸აშურიც მათ დაუმეგობრდა, და შეიქნენ სახსარნი ლოტის ძეთათვის.

⁹დამართე მათ ისევე, როგორც მიდიანს, როგორც სისერას, როგორც იაბინს კიშონის ხევზე;

¹⁰განადგურდნენ ისინი ყენ-დორში, სასუქად იქცნენ მინდვრისათვის.

¹¹მოექეცი მათ, მათს დიდებულებს ისევე, როგორც ყორებს და როგორც ზებს, და როგორც ზებახს, როგორც ცალმუნაყს, ყველა მათს მთავარს,

¹²რომ ამბობდნენ: “დავიმკვიდროთ ჩვენთვის სამკვიდრებელი ღვთისა.”

¹³ღმერთო ჩემო, ჰყავ ისინი ვითარცა ბზე, ვითარცა ნამჯა ქარში;

¹⁴ვითარცა ცეცხლი, დამწველი ტყისა, ვითარცა ალი, მთების მბუგავი;

¹⁵ისე დაედევნე მათ შენი რისხვით, და შენი ქარიშხლით შეაძრწუნე ისინი!

¹⁶აავსე მათი პირი სირცხვილით, რომ ეძებდნენ შენს სახელს, უფალო.

¹⁷შერცხვებიან და შეძრწუნდებიან სამარადჟამოდ, და სირცხვილნაჭამნი დაიღუპებიან.

¹⁸მიხვდებიან, რომ შენი სახელია უფალი, მხოლოდ შენა ხარ უზენაესი მთელ ქვეყნიერებაზე.