Read სბს–სტოკჰოლმი 2001 ფსალმუნები 84 Bible Online

ფსალმუნები 84 - სბს–სტოკჰოლმი 2001 bible

ფსალმუნები 84

¹გუნდის ლოტბარს. კორახის ძეთა. ფსალმუნი. ისურვე, უფალო, ქვეყანა შენი, დააბრუნე ტყვე იაკობისა.

²აპატიე დანაშაული შენს ხალხს, დაფარე ყველა მისი ცოდვა.

³აგვარიდე მთელი შენი გულისწყრომა, დააცხრე შენი მრისხანება.

⁴მოგვაქციე, ღმერთო ჩვენო მხსნელო, და გააუქმე შენი გაჯავრება ჩვენზე.

⁵ნუთუ საუკუნოდ გაგვირისხდები, თაობიდან თაობამდე გააგრძელებ შენს მრისხანებას?

⁶ნუთუ აღარ დაგვიბრუნებ სიცოცხლეს, რათა შენმა ერმა იხაროს შენით?

⁷გვიჩვენე, უფალო, შენი წყალობა და შემწეობა გვიბოძე შენი.

⁸მე კი მოვისმენ, თუ რას იტყვის უფალი ღმერთი; რადგან მშვიდობას იტყვის თავის ერზე, და თავის წმიდებზე, თუკი დაგმობენ სიბრიყვეს.

⁹მართლაც ახლოა ხსნა მისმიერი მის მოშიშთათვის, რათა დიდებამ დაისადგუროს ჩვენს ქვეყანაში.

¹⁰წყალობა და ჭეშმარიტება შეხვდებიან ერთმანეთს, სიმართლე და მშვიდობა გადაჰკოცნიან ერთიმეორეს.

¹¹ჭეშმარიტება დედამიწიდან აღმოცენდება და სიმართლე ზეციდან გადმოიხედავს.

¹²უფალი გვიბოძებს სიკეთეს და ჩვენი მიწა მოგვცემს ნაყოფს.

¹³სიმართლე ივლის მის წინ და გზას გაუკაფავს მის ნაბიჯებს.