Read სბს–სტოკჰოლმი 2001 ფსალმუნები 87 Bible Online

ფსალმუნები 87 - სბს–სტოკჰოლმი 2001 bible

ფსალმუნები 87

¹გალობა. ფსალმუნი კორახის ძეთა. გუნდის ლოტბარს. მახალათის ხმაზე საგალობლად. მოძღვრება ჰემან ეზრახელისა. უფალო, ღმერთო ჩემო მხსნელო, შენს წინაშე ვღაღადებ დღედაღამ!

²მოვიდეს შენს წინაშე ჩემი ლოცვა, ყური მოაპყარ ვედრებას ჩემსას;

³რამეთუ აღივსო ვნებებით სული ჩემი და ჩემი სიცოცხლე ჯოჯოხეთს უახლოვდება.

⁴შევირაცხე მათ გვერდით. სამარეში რომ ჩადიან, შევიქენი, ვითარცა კაცი უძალღონო.

⁵მკვდრებს შორის ვარ ჩაგდებული, ვითარცა მოწყლულნი სამარეში მწოლარენი, რომელთაც აღარ გაიხსენებ და რომელნიც შენი ხელით მოისრნენ.

⁶მომათავსე ქვესკნელის ორმოში, ბნელეთში, მორევში.

⁷მე დამატყდა თავს რისხვა შენი, და ყველა შენი ტალღით დამტანჯე.

⁸შენ განმაშორე ნაცნობნი ჩემნი, საზიზღარი გამხადე მათთვის; დატყვევებული ვარ და ვერ გამოვდივარ.

⁹თვალი ჩემი დანაღვლიანდა ტანჯვით; მოგიხმობდი, უფალო, ყოველდღე, შენსკენ ვიწვდიდი ხელებს.

¹⁰ნუთუ მკვდრებისათვის მოიმოქმედებ სასწაულს, ან მიცვალებულნი წამოდგებიან და განგადიდებენ?

¹¹განა საფლავში ილაპარაკებენ შენს წყალობაზე, და ჯოჯოხეთში - შენს ჭეშმარიტებაზე?

¹²შეიცნობენ წყვდიადში შენს სასწაულებს და შენს სიმართლეს - დავიწყების ქვეყანაში?

¹³მე კი, უფალო, შენ გევედრებოდი, და დილ-დილობით ჩემი ლოცვა წინ გეგებებოდა.

¹⁴რად მიატოვე, უფალო, სული ჩემი, უკუიქციე პირისახე ჩემგან?

¹⁵ღარიბი ვარ და ტანჯული ყრმობიდანვე, შენს საშინელებებს ვზიდავ, დავუძლურდი.

¹⁶თავზე გადამიარა შენმა რისხვის სასჯელმა, შენმა შიშის ზარმა გამანადგურა.

¹⁷გარე მივლიდნენ, წყლების მსგავსად მთელ დღეს, ყველა ერთად მერტყმოდა გარს.

¹⁸შენ განმაშორე მოყვარე და მეგობარი, ჩემი ნაცნობნი ბნელით მოცულან.