Read სბს–სტოკჰოლმი 2001 ფსალმუნები 88 Bible Online

ფსალმუნები 88 - სბს–სტოკჰოლმი 2001 bible

ფსალმუნები 88

¹მოძღვრება. ეთან ეზრახელისა. უფლის წყალობებს მარადჟამს ვუგალობებ. თაობიდან თაობას ვაცნობებ შენს ჭეშმარიტებას ჩემი პირით.

²რადგანაც ვთქვი: “უკუნისამდე დაფუძნდეს წყალობა, და ცათა შიგან. განიმტკიცო ჭეშმარიტება შენი”

³შენ თქვი: “დავდე პირობა ჩემს რჩეულთან, შევფიცე დავითს, ჩემს მორჩილს:

⁴‘უკუნისამდე გავამაგრებ შენს შთამომავლობას და თაობიდან თაობამდე დავაფუძნებ შენს ტახტს.’”

⁵განადიდებენ ცანი შენს საოცრებებს, უფალო, ასევე შენს ჭეშმარიტებას წმიდათა კრებულში.

⁶რადგან ვინ შეედრება ცაში უფალს, ვინ მიემსგავსება უფალს ღვთის შვილებში?

⁷ღმერთი დიდებულია წმიდათა კრებულში მეტად, და საშიშია ყველასათვის მის ირგვლივ.

⁸უფალო, ღმერთო ძალთაო! ვინ არის შენებრ მედგარი? და შენი ჭეშმარიტება შენს გარშემოა!

⁹შენ ბატონობ ზღვის მოქცევაზე, მის აბობოქრებულ ტალღებს შენ ამშვიდებ.

¹⁰შენ განართხე ეგვიპტე, როგორც განგმირული; შენი ძლიერი მკლავით გაფანტე შენი მტრები.

¹¹შენია ცანი, დედამიწაც შენია; სამყარო და მისი სავსება შენ დააფუძნე.

¹²ჩრდილოეთი და სამხრეთი შენ შეჰქმენი; თაბორი და ხერმონი შენს სახელს უმღერებენ.

¹³შენია მკლავი მაგარი; გააძლიერე ხელი შენი, მოამაღლე მარჯვენა შენი.

¹⁴სიმართლე და მართლმსაჯულებაა შენი ტახტის საფუძველი, წყალობა და ჭეშმარიტება შენი სახის წინაშე დადიან.

¹⁵ნეტარ არს ხალხი, მცოდნე ბუკის ხმობისა; ისინი შენი სახის შუქით იარებიან, უფალო;

¹⁶შენი სახელით ილხენენ ყოველდღე და შენი სიმართლით ამაღლდებიან.

¹⁷რადგან შენა ხარ მშვენება მათი ძალისა, და შენი ნებით მომაღლდება ღირსება ჩვენი.

¹⁸რადგან უფლისაგან არის ჩვენი ფარი და წმიდა ისრაელისაგან - მეფე ჩვენი.

¹⁹მაშინ ელაპარაკე ხილვისას შენს წმიდებს და უთხარი: “ვუბოძე დახმარება გმირს; ავამაღლე რჩეულნი ხალხისაგან;

²⁰ვპოვე დავითი, მსახური ჩემი, და ჩემი, წმიდა ზეთი ვცხე მას.

²¹რომ ჩემმა ხელმა წარმართოს იგი, და ჩემმა მკლავმა გაამაგროს.

²²ვერ დაჯაბნის მას მტერი, და ურჯულოების ძე ვერ დაჩაგრავს მას.

²³მოვსრავ მის წინაშე მის მოდავეთ, და მის მოძულეებს დავამხობ;

²⁴ჭეშმარიტება და წყალობა ჩემი მასთანაა და ჩემი სახელით მომაღლდება ღირსება მისი.

²⁵ზღვას გადავაწვდენ მის ხელს, და მდინარეებს - მის მარჯვენას.

²⁶ის მომიწოდებს: ‘მამაჩემი ხარ, ჩემი ღმერთი და ბურჯი ჩემი ხსნისა.’

²⁷მეც უფროსობას ვუბოძებ მას, ქვეყნიერების მეფეებზე უმაღლესობას,

²⁸უკუნისამდე შევუნახავ მას ჩემს წყალობას, და ჩემი აღთქმა საიმედო იქნება მისთვის.

²⁹და დავამკვიდრებ უკუნისამდე ნაშიერს მისას და მისი ტახტი, ვითარცა დღენი ცისანი.

³⁰თუ მიატოვეს მისმა შვილებმა ჩემი რჯული და ჩემს სამართალს არ გაჰყვებიან,

³¹თუ ჩემს წესდებებს დაარღვევენ და ჩემს მცნებებს არ დაიცავენ,

³²კვერთხით მოვკითხავ მათ დანაშაულს და გვემით - შეცოდებას.

³³მაგრამ ჩემს წყალობას არ მოვუშლი მას და არ გავაცრუებ ჩემს ჭეშმარიტებას.

³⁴არ შევბღალავ ჩემს აღთქმას და არ შევცვლი, რაც აღმოხდა ჩემს ბაგეებს.

³⁵ერთხელ შევფიცე ჩემი სიწმიდით; განა ვეცრუები დავითს?

³⁶მისი ნაშიერი მარადჟამს იქნება და მისი ტახტი, ვითარცა მზე, ჩემს წინაშე;

³⁷მკვიდრი იქნება მთვარესავით უკუნისამდე, და ჭეშმარიტი მოწმე ღრუბლებში.”

³⁸მაგრამ მიატოვე და შეიზიზღე, განრისხდი შენს ცხებულზე!

³⁹უგულებელყავ აღთქმა შენს მორჩილთან, მიწას დაანარცხე გვირგვინი მისი;

⁴⁰მოშალე ყველა ზღუდენი მისნი; ნანგრევებად აქციე სიმაგრენი მისნი.

⁴¹გაძარცვეს იგი გამვლელ-გამომვლელებმა, მეზობლის დასაცინი გახდა;

⁴²მაღლა ასწიე მის მოშუღართა მარჯვენა, გაახარე ყველა მისი მტერი.

⁴³თანაც დააჩლუნგე მისი მახვილი და არ უწყალობე გამარჯვება ომში;

⁴⁴გააცამტვერე სიწმიდე მისი და მისი ტახტი მიწასთან გაასწორე;

⁴⁵შეამცირე დღენი მისი სიჭაბუკისა, და სირცხვილით შემოსე იგი.

⁴⁶როდემდე დაგვემალები, უფალო? განუწყვეტლივ, ააგზნებ ცეცხლივით შენს მრისხანებას?

⁴⁷გაიხსენე, რა არის ჩემი წუთისოფელი; რისთვის შეჰქმენი ფუჭად ყოველი ძე ადამისა?

⁴⁸ვინ არის კაცი სიკვდილი არ იხილოს, და გადაარჩინოს თავისი სული ჯოჯოხეთის ხელიდან?

⁴⁹სად არის შენი ადრინდელი წყალობა, უფალო, დავითს რომ შეჰფიცე შენი ჭეშმარიტებით?

⁵⁰გაიხსენე, უფალო, დამცირება შენს მორჩილთა, უბით რომ ვატარებ ყველა ძლიერი ხალხისაგან.

⁵¹როგორ ლანძღავენ შენი მტრები, უფალო, როგორ ლანძღავენ შენი ცხებულის კვალს. 

⁵²კურთხეულ არს უფალი უკუნისამდე! ამინ, ამინ!