Read სბს–სტოკჰოლმი 2001 ფსალმუნები 90 Bible Online

ფსალმუნები 90 - სბს–სტოკჰოლმი 2001 bible

ფსალმუნები 90

¹უზენაესის საფარქვეშ დამკვიდრებული ყოვლისშემძლის ჩრდილქვეშ ისვენებს.

²ეუბნება უფალს: “ჩემი მფარველი და სიმაგრეა ჩემი ღმერთი, რომელსაც ვესავ.”

³ის დაგიხსნის მონადირის მახისაგან, და მომსრავი ჭირისაგან.

⁴თავის მხრებს გადაგაფარებს და მის ფრთებს შორის შეაფარებ თავს; ფარი და ბურჯია მისი ჭეშმარიტება.

⁵ნუ შეგეშინდება ღამის საშინელებისა, ისრის - დღისით გაფრენილის,

⁶შავი ჭირის - ბნელში მოარულის, სენის - შუადღის მძარცველის.

⁷დაეცემა შენს გვერდით ათასი და ათი ათასი შენს მარჯვნივ, შენ კი არ მოგეკარება.

⁸მხოლოდ შენი თვალით შეხედავ და დაინახავ მისაგებელს ბოროტეულთა.

⁹რადგან შენ [ამბობ]: “უფალი არის ჩემი თავშესაფარი.” შენს საცხოვრისად აირჩიე უზენაესი.

¹⁰არ შეგემთხვევა სიავე, და წყლული ვერ მიეკარება შენს კარავს.

¹¹რამეთუ თავის ანგელოზებს უბრძანა, დაგიცვან ყველა შენს გზაზე.

¹²ხელში აყვანილს გატარებენ, რომ ფეხი არ წამოჰკრა ქვაზე.

¹³ლომსა და უნასს ფეხს დაადგამ, ლომის ბოკვერს და ურჩხულს გაქელავ.

¹⁴უფალი ამბობს: “რაკი მოისურვა, გადავარჩენ მას, დავიფარავ მას, რადგან იცნო სახელი ჩემი.

¹⁵მომიხმობს მე და ვუპასუხებ, მასთან ვარ გასაჭირში; გამოვიხსნი და ვასახელებ.

¹⁶დღეთა ხანგრძლიობით გავაძღებ და შემწეობას მოვუვლენ ჩემსას.”