Read სბს–სტოკჰოლმი 2001 ფსალმუნები 93 Bible Online

ფსალმუნები 93 - სბს–სტოკჰოლმი 2001 bible

ფსალმუნები 93

¹უფალო, ღმერთო შურისძიებისა, ღმერთო შურისძიებისა, გამოჩნდი!

²ამაღლდი, მსაჯულო ქვეყნიერებისა, მიუზღე საზღაური ამპარტავნებს.

³ვიდრემდე, უფალო, ბოროტნი, ვიდრემდე უნდა ილხენდნენ ბოროტნი?

⁴აღმითქვამენ და ამბობენ სიცრუეს, ამაყად ყვებიან სიმრუდის მოქმედნი.

⁵შენს ერს, უფალო, ჩაგრავენ და შენს სამემკვიდროს ტანჯავენ.

⁶ქვრივსა და ხიზანს ხოცავენ და ობლებს ჟლეტენ.

⁷ამბობენ: “ვერ იხილავს უფალი, და ვერ გაიგებს ღმერთი იაკობისა.”

⁸გონს მოდით, უგუნურნო ერისანო! უმეცარნო, როდის დაჭკვიანდებით?

⁹დამნერგავი ყურისა განა ვერ მოისმენს? თვალის შემქმნელი განა ვერ დაინახავს?

¹⁰ხალხთა განმრიგე განა ვერ ამხილებს - ის, ვინც ასწავლის ადამიანს ჭკუას?

¹¹უფალმა იცის ზრახვანი კაცისა, რადგან ამაონი არიან ისინი.

¹²ნეტარია კაცი, რომელსაც დასჯი, უფალო, და შენს რჯულს ასწავლი.

¹³რათა დაასვენო ავი დღეებისაგან, ვიდრე ბოროტს ორმო გაეთხრებოდეს.

¹⁴რადგან არ მოიშორებს უფალი თავის ხალხს და თავის სამემკვიდრეოს არ მიატოვებს;

¹⁵რადგან სიმართლესთან დაბრუნდება სამართალი, და მას მიჰყვება ყველა გულწრფელი.

¹⁶ვინ აღუდგება ჩემს გამო ბოროტებას? მხარში ვინ ამომიდგება სიმრუდის მოქმედთა წინააღმდეგ?

¹⁷უფალი რომ არ ყოფილიყო ჩემი შემწე, ცოტაც და, დასახლდებოდა ჩემი სული ჯოჯოხეთში.

¹⁸თუ ვთქვი: “მომიცურდა ფეხი,” შენი წყალობა, უფალო, გამამაგრებს.

¹⁹როცა ზრუნვით ამევსება გული, შენი ნუგეში მიამებს სულს.

²⁰ნუთუ გაგიტოლდება ტახტი უკუღმართთა, უსამართლობას რომ სჩადიან შენი რჯულის საწინააღმდეგოდ?

²¹გაილაშქრებენ მართლის სულზე, და წმიდა სისხლს ბრალში გახვევენ.

²²მაგრამ უფალი გახდა ჩემი მტკიცე სიმაგრე, ჩემი თავშესაფრის კლდე.

²³მათვე მიაგებს თავიანთ უსამართლობას და თავიანთ სიავით მოსპობს მათ, მოსპობს მათ უფალი, ღმერთი ჩვენი.