Read სბს–სტოკჰოლმი 2001 იგავნი სოლომონისა 1 Bible Online

იგავნი სოლომონისა 1 - სბს–სტოკჰოლმი 2001 bible

იგავნი სოლომონისა 1

¹იგავნი სოლომონისა, ძისა დავითისა, ისრაელის მეფისა.

²შესაცნობად სიბრძნისა და შეგონებისა, გასაგებად გონების ნათქვამისა,

³მისაღებად ჭკუის შეგონებისა, სიმართლისა, სამართლისა და სამართლიანობისა;

⁴მისაცემად ბრიყვთათვის გონიერებისა, ყმაწვილთათვის - ცოდნისა და განსჯისა.

⁵მოისმენს ბრძენი და შეიმატებს სწავლას, და გონიერი სიბრძნეს შეიძენს,

⁶გასაგებად იგავისა და ქარაგმისა და ბრძენთა სიტყვებისა და გამოცანებისა.

⁷უფლის შიში ცოდნის სათავეა, სიბრძნე და დარიგება კი ბრიყვებს ეზიზღებათ.

⁸ისმინე, შვილო ჩემო, მამაშენის დარიგება და დედაშენის სწავლებას ნუ მიატოვებ.

⁹რადგან ეს მშვენიერი გვირგვინია შენს თავზე, მანიაკი შენს ყელზე.

¹⁰ჩემო შვილო, თუ ცოდვილნი გაცთუნებენ, ნუ დათანხმდები.

¹¹თუ გეტყვიან: “წამოდი ჩვენთან, ჩავუსაფრდეთ სისხლის საღვრელად, უმიზეზოდ დავუდარაჯდეთ უდანაშაულოს,

¹²ჩავყლაპოთ ისინი, როგორც შავეთმა ცოცხლად და მრთელად, საფლავში ჩამავალთ მსგავსად,

¹³ყოველგვარ ძვირფას ქონებას მოიხვეჭთ, ჩვენს სახლებს ნადავლით გავავსებთ.

¹⁴ყარე შენი წილი ჩვენთან ერთად, ერთი ქისა გვექნება ჩვენ ყველას!”

¹⁵ჩემო შვილო, ნუ ივლი მათთან გზაზე, შეაკავე შენი ფეხი მათი სავალიდან.

¹⁶რადგან მათი ფეხები ბოროტისაკენ გარბიან და სისხლის საღვრელად ისწრაფიან.

¹⁷რადგან ამაოდ იფინება ბადე რომელიმე ფრთოსანის თვალში.

¹⁸ისინი კი თავიანთ სისხლს უსაფრდებიან, თავიანთ სულებს უდარაჯდებიან.

¹⁹ასეთია გზანი ყველა ხარბი მომხვეჭლისა: სიცოცხლეს ართმევს იგი მის პატრონს.

²⁰სიბრძნე ქუჩაში შემოსძახებს, მოედნებზე გამოსცემს თავის ხმას;

²¹ხალხმრავალ ადგილებში ღაღადებს იგი, კარიბჭის ზღურბლზე, ქალაქში ამბობს ის თავის სათქმელს:

²²“როდემდე ეყვარებათ ბრიყვებს სიბრიყვე, თავქარიანნი მასხარობით დატკბებიან, ხოლო სულელებს ეძულებათ ცოდნა?

²³მიუბრუნდით ჩემს შეგონებას, გამოგითქვამთ ჩემს გულისთქმას, გაუწყებთ ჩემს სიტყვებს.

²⁴რადგანაც გიხმობდით მე, თქვენ კი ყურს არ ათხოვებდით. გიწვდით ხელს, მაგრამ არ იყო შემსმენელი.

²⁵და უგულებელ ჰყავით ყველა ჩემი რჩევა და ჩემი შეგონება არ ინდომეთ.

²⁶მეც თქვენს უბედურებაზე გავიცინებ, დაგცინებთ თქვენ შიშის მოგვრისას.

²⁷როდესაც გეწევათ შიში, როგორც ქარიშხალი, და თქვენი უბედურება გრიგალივით მოვა, როდესაც გეწევათ თქვენ უბედურება და გაჭირვება.

²⁸მაშინ მომიხმობენ მე და არ ვუპასუხებ, დამიწყებენ ძებნას, მაგრამ ვერ მპოვებენ.

²⁹იმის წილ, რომ სძულდათ ცოდნა და უფლის შიში არ ამოირჩიეს,

³⁰არ ინდომეს ჩემი რჩევა, მოიძულეს ჩემი ყველა შეგონება.

³¹და იგემებენ თავიანთი გზის ნაყოფს და თავიანთი ბოროტი განზრახვებით გაძღებიან.

³²რადგან გულუბრყვილოებს მათი განდგომა მოკლავს და ბრიყვებს მათი კმაყოფილება მოსპობს.

³³მაგრამ ვინც მომისმენს, მშვიდად იცხოვრებს და დამშვიდებულს ბოროტის შიში აღარ ექნება.”