Read სბს–სტოკჰოლმი 2001 იგავნი სოლომონისა 12 Bible Online

იგავნი სოლომონისა 12 - სბს–სტოკჰოლმი 2001 bible

იგავნი სოლომონისა 12

¹დარიგება უყვარს ცოდნის მოყვარულს, მხილება უმეცარს სძულს.

²კეთილი მოწონებას მოიხვეჭს უფლისაგან, მზაკვარ კაცს კი გაასამართლებს.

³ვერ დაფუძნდება ადამიანი უკეთურებით, მართალთა ფესვი კი არ შეირყევა.

⁴გამრჯე ქალი გვირგვინია თავისი ქმრისა, შემარცხვენელი კი - როგორც ხრწნა მის ძვლებში.

⁵მართალთა ფიქრები სამართალია, უკეთურთა ფანდები - სიცრუე.

⁶უკეთურთა სიტყვები ჩასაფრებაა სისხლის დასაღვრელად, მართალთა ბაგენი კი იხსნიან მათ.

⁷დაემხობიან უკეთურნი და აღარ იქნებიან, მართალთა სახლი კი დარჩება.

⁸მისი ჭკუისამებრ შეაქებენ კაცს, გულმრუდი კი დასაცინი გახდება.

⁹სჯობს იყო შეურაცხი და თავისი თავის პატრონი ვიდრე პატივმოყვარე და ულუკმაპურო.

¹⁰სამართალმა იცის თავისი საქონლის საჭიროება, ხოლო უკეთურთა სიბრალულიც კი სასტიკია.

¹¹თავისი მიწის დამმუშავებელი პურით გაძღება, ამაოების მდევნელი კი უგნურია.

¹²უკეთურს ბოროტთა მომხრობა სწადია, მართალთა ფესვი კი ნაყოფს გამოსცემს.

¹³ავ მეტყველებაში ბოროტი მახეა დაგებული, მართალი კი გაჭირვებიდან გამოვა.

¹⁴თავისი პირის ნაყოფისგან კაცი სიკეთით გაძღება, ადამიანის ხელის საზღაური კი მასვე დაუბრუნდება.

¹⁵სულელის გზა სწორია მის თვალში, ბრძენი კი რჩევას უსმენს.

¹⁶სულელი გამოამჟღავნებს თავის სიბრაზეს, გონიერი კი შეურაცხყოფას ფარავს.

¹⁷ჭეშმარიტების აღმომსუნთქველი სიმართლეს აცხადებს, ცრუ მოწმე კი - ცბიერებას.

¹⁸ზოგი ისე ლაპარაკობს, თითქოს მახვილით ჩხვლეტდეს, ბრძენთა ენა კი კურნებაა.

¹⁹ჭეშმარიტების ბაგენი სამუდამოდ დაფუძნდებიან, ცრუ ენა კი წამიერია.

²⁰ცბიერებაა ბოროტის განმზრახველთა გულში, მშვიდობის მრჩეველთ კი სიხარული აქვთ.

²¹არავითარი ზიანი არ მოუვა მართალს, უკეთურნი კი უბედურებით გაივსებიან.

²²ცრუ ბაგენი სძულს უფალს, ჭეშმარიტებით მოქმედნი კი მისთვის სასურველია.

²³გონიერი ადამიანი ფარავს ცოდნას, რეგვენთა გული კი სისულელეს აცხადებს.

²⁴ბეჯითი ხელი იბატონებს, ზარმაცი კი ხარკად იქნება.

²⁵გულში დარდი კაცს დათრგუნავს, კეთილი სიტყვა კი გაახარებს.

²⁶მართალი თავის მოყვასს წინ უძღვის, უკეთურთა გზა კი მათვე აცდუნებს.

²⁷სიზარმაცე ვერ მოიპოვებს ნანადირევს, ადამიანის ყველაზე დიდი ქონება სიბეჯითეა.

²⁸მოწყალების გზაზე სიცოცხლეა და მისი ბილიკი უკვდავებისკენ არის მიმართული.