Read სბს–სტოკჰოლმი 2001 იგავნი სოლომონისა 13 Bible Online

იგავნი სოლომონისა 13 - სბს–სტოკჰოლმი 2001 bible

იგავნი სოლომონისა 13

¹ბრძენი შვილი ისმენს მამის დარიგებას, თავქარიანი კი არ ისმენს საყვედურს.

²თავისი პირის ნაყოფიდან კაცი სიკეთეს შეჭამს, მოღალატეთა სული კი - ნაძარცვს.

³ვინც თავის პირს უფრთხილდება, თავის სიცოცხლეს იცავს. ვინც ფართოდ აღებს თავის ბაგეებს, უბედურება ელის მას.

⁴ზარმაცის სულს სწადია და არა აქვს, ბეჯითთა სული კი გამსუყდება.

⁵მართალს სძულს ტყუილი სიტყვა, უკეთური კი აუგ და შემარცხვენელ საქმეებს სჩადის.

⁶სიმართლე იცავს უბიწო გზას, უკეთურება კი აცდუნებს შემცოდველს.

⁷ზოგი მდიდრად აჩვენებს თავს და არაფერი არა აქვს, ზოგი კი - ღარიბად და დიდი ქონება აქვს.

⁸სიცოცხლის გამოსასყიდი კაცის სიმდიდრეა, ღარიბს კი არ ესმის საყვედური.

⁹მართალთა სინათლე გაბრწყინდება, უკეთურთა სანთელი კი ჩაქრება.

¹⁰მხოლოდ ამპარტავნობისაგან წარმოიშვება განხეთქილება, მრჩეველთ კი სიბრძნე აქვთ.

¹¹ქონება, ამაოებით შეძენილი, მცირდება, ხელით შემკრებელი კი გაამრავლებს მას.

¹²ხანგრძლივი მოლოდინი გულს ქანცავს, აღსრულებული სურვილი კი სიცოცხლის ხეა.

¹³ღმერთის სიტყვის აბუჩად ამგდები თავის თავს აზიანებს, მცნების მოშიში კი დაჯილდოვდება.

¹⁴ბრძენის მოძღვრება სიცოცხლის წყაროა, რათა გაერიდოს სიკვდილის მახეს.

¹⁵კეთილი მოხედვა წყალობას გასცემს, მოღალატეთა გზა კი მძიმეა.

¹⁶ყოველი გონიერი ცოდნით მოქმედებს, რეგვენი კი სისულელეს გამოაფენს.

¹⁷უკეთური მაცნე გაჭირვებაში ვარდება, ერთგული მოციქული კი კურნებაა.

¹⁸სიღარიბე და დამცირება დარიგების უკუმგდებელს, შეგონების დამცველი კი პატივცემული იქნება.

¹⁹აღსრულებული სურვილი სულს ეამება, რეგვენთათვის კი სისაძაგლეა ბოროტებისაგან განდგომა.

²⁰ბრძენებთან დამავალი დაბრძენდება, რეგვენთა მოყვასი კი გაუბედურდება.

²¹ცოდვილებს ბოროტება აედევნება, მართალთ კი კეთილი მიეზღვებათ.

²²კეთილი კაცი შვილთაშვილებს მემკვიდრეობას უტოვებს, ცოდვილის ქონება კი მართლისათვის ინახება.

²³ბევრი საჭმელია ღარიბთა ყანაში, ზოგნი კი უმარილობით იღუპებიან.

²⁴ვინც თავის შოლტს ზოგავს, სძულს თავისი ძე, ხოლო ვისაც უყვარს, სჯის მას.

²⁵მართალი ძღომაზე ჭამს, უკეთურის მუცელი კი ცარიელია.