Read სბს–სტოკჰოლმი 2001 იგავნი სოლომონისა 15 Bible Online

იგავნი სოლომონისა 15 - სბს–სტოკჰოლმი 2001 bible

იგავნი სოლომონისა 15

¹ტკბილი პასუხი მიაქცევს გულისწყრომას, შეურაცხმყოფელი სიტყვა კი აღაგზნებს რისხვას.

²ბრძენთა ენა საამურს ხდის ცოდნას, ბრიყვთა პირი კი სისულელეს გამოთქვამს.

³ყველგან არის უფლის თვალი, ხედავს ბოროტთა და კეთილთ.

⁴მშვიდი ენა სიცოცხლის ხეა, მით მზაკვრობა - სულის შემუსვრა.

⁵სულელი აბუჩად იგდებს მამის დარიგებას, შეგონების დამცველი კი გონიერი ხდება.

⁶მართლის სახლში მრავალი განძია, უკეთურის მოსავალში კი - ვაება.

⁷ბრძენთა ბაგენი ცოდნას ავრცელებენ, ბრიყვთა გული ასეთი არ არის.

⁸უკეთურთა მსხვერპლი უფლისათვის სისაძაგლეა, პატიოსანთა ლოცვა კი - სიხარული.

⁹უფლის წინაშე სისაძაგლეა უკეთურის გზა, სიმართლის მდევნელი კი უყვარს მას.

¹⁰სასჯელი ელის სწორი გზის მიმტოვებელს, დარიგების მოძულე კი მოკვდება.

¹¹შავეთი და ჯოჯოხეთი ღიაა უფლის წინაშე, მით უფრო - ადამის ძეთა გულები.

¹²ბრიყვს არ უყვარს თავისი მამხილებელი, ბრძენებთან არ წავა იგი.

¹³მხიარული გული სახეს ახალისებს, გულის დარდისას სული შემუსრვილია.

¹⁴გონიერის გული ცოდნას ეძიებს, ბრიყვის პირი კი სისულელით იკვებება.

¹⁵ჩაგრულის ყოველი დღე ცუდია, გულით მხიარულს კი ლხინი აქვს მუდამ.

¹⁶სჯობს გქონდეს მცირედი, მაგრამ უფლისადმი შიშით, ვიდრე დიდი საუნჯე და მასთან ერთად შფოთვა.

¹⁷სჯობს გქონდეს მწვანილის სადილი და სიყვარული ვიდრე ნასუქალი ხარი და სიძულვილი მასთან ერთად.

¹⁸ფიცხი კაცი აღვივებს განხეთქილებას, სულგრძელი კი აქრობს შუღლს.

¹⁹ზარმაცის გზა ეკლიან ღობესავითაა, პატიოსანთა გზა სწორია.

²⁰ბრძენი შვილი მამას ახარებს, ბრიყვი ადამიანი კი აბუჩად იგდებს თავის დედას.

²¹სისულელე სიხარულია ბრიყვისა, გონიერი კაცი კი სწორად მავალია.

²²რჩევის გარეშე ჩაიშლება განზრახვანი, ბევრი მრჩევლისას კი შესრულდება.

²³კაცის სიხარული მისი ბაგის პასუხშია და კარგია სიტყვა თავის დროზე.

²⁴გონიერის ცხოვრების გზა მაღლა მიდის, რათა დაბლა განერიდოს შავეთს.

²⁵ამპარტავანთა სახლს აღმოფხვრის უფალი, ქვრივის საზღვარს კი აღადგენს.

²⁶ბოროტის განზრახვანი უფლისთვის სისაძაგლეა, საამური სიტყვები კი - სუფთა.

²⁷ის ვინც მომხვეჭელობს, თავის სახლს აუბედურებს, ქრთამის მოძულე კი იცოცხლებს.

²⁸მართლის გული დაფიქრდება საპასუხოდ, უკეთურთა პირი ბოროტებას ღვრის.

²⁹უფალი შორსაა უკეთურთაგან, მართალთა ლოცვა კი შესმენილ იქნება.

³⁰თვალთა სინათლე ახარებს გულს, კარგი ამბავი კი ძვალს აპოხიერებს.

³¹ყური, სასიცოცხლო მხილების მომსმენი, ბრძენთა შორის გაათევს ღამეს.

³²დარიგების უკუმგდებელს ეზიზღება თავისი სული, მხილების მომსმენი კი გონებას იხვეჭს.

³³უფლის შიში ბრძნული დარიგებაა და პატივზე წინ არის მორჩილება.