Read სბს–სტოკჰოლმი 2001 იგავნი სოლომონისა 19 Bible Online

იგავნი სოლომონისა 19 - სბს–სტოკჰოლმი 2001 bible

იგავნი სოლომონისა 19

¹სჯობს ღარიბი თავისი უბიწობით მავალი მრუდებაგიან მდიდარს და თანაც ბრიყვს.

²არც ცოდნის გარეშე ვარგა სული და, ვინც ჩქარობს, შესცოდავს.

³ადამიანის სისულელე რყვნის მის გზას და უფალზე წყრება მისი გული.

⁴ქონება ჰმატებს ბევრ მოყვასს, უქონელი კი თავისი მეგობრისგან განშორებულია.

⁵ცრუ მოწმე არ დარჩება დაუსჯელი და ტყუილის მოლაქლაქე არ გადარჩება.

⁶ბევრი ეძებს წყალობას დიდებულთა წინაშე და საჩუქრის მიმცემს ყველა მეგობრობს.

⁷ღარიბი სძულს ყველა ძმას, მით უფრო მისი მეგობრები შორდებიან მას. აუსრულებელ დანაპირებთა მდევარია იგი.

⁸ვინც გულს იძენს, მას თავისი თავი უყვარს, გონებას ინახავს, რათა სიკეთე ჰპოვოს.

⁹ცრუ მოწმე არ დარჩება დაუსჯელი და ტყუილის მოლაქლაქე დაიღუპება.

¹⁰ბრიყვს არ შეეფერება ფუფუნება, მით უფრო მონას - ბატონობა მთავრებზე.

¹¹ადამიანის ჭკუა სულგრძელს ხდის მას და მისი ღირსებაა დანაშაულის მიტევება.

¹²ლომის ბოკვერის ღრიალს ჰგავს მეფისგან შერისხვა, და მისი წყალობა ბალახზე ცვრის მსგავსია.

¹³მამისათვის უბედურებაა ბრიყვი შვილი, ხოლო ცოლის ჭირვეულობა - შეუწყვეტელი წვეთა.

¹⁴სახლი და ქონება მამათა მემკვიდრეობაა, გონიერი ცოლი კი უფლისაგანაა.

¹⁵სიზარმაცე ძილს მოჰგვრის კაცს და უქნარა სული იშიმშილებს.

¹⁶მცნების დამცველი თავის თავს იცავს, უფლის გზების აბუჩად ამგდები მოკვდება.

¹⁷ღატაკის მწყალობელი უფალს აძლევს სესხს და სამაგიეროს ის მიუზღავს მას.

¹⁸დასაჯე შენი შვილი, მაგრამ არ განაწყო შენი სული მის სასიკვდილოდ.

¹⁹დიდად მრისხანეს დაედოს სასჯელი, რადგან, თუ დაინდობ მას, მოგიწევს სასჯელის გაკვლადება.

²⁰ისმინე რჩევა და მიიღე დარიგება, რათა დაბრძენდე საბოლოოდ.

²¹ბევრი განზრახვაა კაცის გულში, მაგრამ უფლის გადაწყვეტილება ასრულდება.

²²ადამიანის სწრაფვა მისი სიკეთეა და ღატაკი სჯობს მზაკვარ კაცს.

²³უფლის შიშს სიცოცხლისაკენ მიჰყავს კაცი, მაძღარი იქნება და არ ეწევა მას ბოროტი.

²⁴ზარმაცი ხელს ჰყოფს ლანგარში და თავის პირთანაც არ მოაბრუნებს მას.

²⁵ურტყი თავქარიანს და ბრიყვი გონიერი გახდება. შეაგონე გონიერს, გაიგებს სწავლას.

²⁶მამის მძარცველი და დედის გამგდები შემარცხვენელი და უპატიო შვილია.

²⁷ნუ მოისმენ, ჩემო შვილო, შეგონებას, რომელიც გირჩევს გონიერი სიტყვებიდან გადახვევას.

²⁸უგვანი მოწმე ქირდავს სამართალს და უკეთურთა პირი ყლაპავს უსამართლობას.

²⁹თავქარიანთათვის მზადაა სასჯელი, რეგვენთა ზურგზე კი ცემა-ტყეპაა.