Read სბს–სტოკჰოლმი 2001 იგავნი სოლომონისა 22 Bible Online

იგავნი სოლომონისა 22 - სბს–სტოკჰოლმი 2001 bible

იგავნი სოლომონისა 22

¹უკეთესია სახელი დიდ სიმდიდრეზე, ვერცხლსა და ოქროს კი წყალობა სჯობს.

²მდიდარი და ღატაკი ერთმანეთს ხვდებიან: მათი ყველას გამჩენი უფალია.

³გონიერმა დაინახა ბოროტი და გაერიდა, ბრიყვებმა კი გადაიარეს და დაისაჯნენ.

⁴საზღაური მორჩილებისა, უფლის შიშისა, არის სიმდიდრე, პატივი და სიცოცხლე.

⁵ეკლები და მახეებია ცბიერების გზაზე, თავისი სულის დამცველი გაერიდება მათ.

⁶აღზარდე ყმაწვილი მისი გზის მიხედვით, კიდევაც რომ მოხუცდეს, არ გადაუხვევს მისგან.

⁷მდიდარი ღატაკებზე მთავრობს და მსესხებელი მონაა გამსესხებლისა.

⁸უსამართლობის დამთესავი უბედურებას მოიმკის და მისი მრისხანების კვერთხი გადატყდება.

⁹კეთილმოსურნე კურთხეულ იქნება, რადგან თავისი პურიდან მისცა ღარიბს.

¹⁰გააგდე ბრიყვი და გავა განხეთქილებაც, შეწყდება ჩხუბი და კილვა.

¹¹სპეტაკი გულის მოყვარულს სიამე აქვს ბაგეზე, მისი მოყვასი მეფეა.

¹²უფლის თვალები იცავენ ცოდნას, მოღალატის ნათქვამს კი გააბათილებს.

¹³ზარმაცი ამბობს: “ლომია გარეთ, შუა ქუჩაში ვიქნები მოკლული”.

¹⁴ღრმა თხრილია უცხოთა პირი, ვისზედაც გამწყრალია უფალი, ჩავარდება შიგ.

¹⁵სისულელე მიეკრო ყმაწვილის გულს, დარიგების კეტი მოაშორებს მისგან.

¹⁶ვინც ღარიბს ჩაგრავს, რათა გაიმრავლოს თავისი და აძლევს მდიდარს, მას დააკლდება.

¹⁷დახარე შენი ყური და ისმინე სიტყვანი ბრძენთა, და შენი გული მიაპყარ ჩემს ცოდნას,

¹⁸რადგან საამო იქნება შენთვის, თუ შენს წიაღში შეინახავ და ყველა ერთად განმტკიცდება შენს ბაგეებზე.

¹⁹რომ იყოს უფალში შენი საყრდენი, შენც გასწავლე დღეს,

²⁰განა არ მოგწერე სამჯერ რჩევითა და სწავლით,

²¹რომ მესწავლებინა შენთვის ჭეშმარიტების სიტყვათა სიმტკიცე, რათა მიგეგო ჭეშმარიტი სიტყვები შენს გამომგზავნელთათვის?

²²ნუ გაძარცვავ ღარიბს, რადგან ღარიბია იგი, და ნუ დაჩაგრავ ღატაკს კარიბჭესთან,

²³რადგან უფალი იდავებს მათ დავას და სულს წაართმევს მათ წამართმეველთ.

²⁴ნუ დაემოყვრები ბრაზიანს და ფიცხ კაცთან ნუ მიხვალ,

²⁵რომ არ გაიწვრთნა მის გზებში და არ დაუგო მახე შენს სულს.

²⁶ნუ იქნები მათ შორის, ხელს რომ ურტყამენ, თავდებად რომ უდგებიან სესხზე.

²⁷თუ არაფერი გმართებს, რისთვის გამოგაცლიან ქვეშაგებს?

²⁸ნუ გადასცდები საუკუნო საზღვარს, რომელიც შენმა მამებმა დადეს.

²⁹გინახავს შენ კაცი, სწრაფი თავის საქმეში? მეფეთა წინაშე წარდგება იგი, არ წარდგება ბნელთა წინაშე.