Read სბს–სტოკჰოლმი 2001 იგავნი სოლომონისა 25 Bible Online

იგავნი სოლომონისა 25 - სბს–სტოკჰოლმი 2001 bible

იგავნი სოლომონისა 25

¹ესეც სოლომონის იგავებია, რომელნიც გადაიწერეს ხიზკიაჰუს, იუდას მეფის, კაცებმა:

²საქმეთა დაფარვა ღვთის ღირსებაა ხოლო საქმის გამოკვლევა - მეფის ღირსება.

³ზეცა მაღალია და მიწა - ღრმა, ხოლო მეფეთა გული გამოუკვლეველია.

⁴განაშორეთ წიდა ვერცხლისაგან და გამოუვა გამომდნობელს ჭურჭელი.

⁵მოაშორეთ მეფეს უკეთური და მისი ტახტი სიმართლით განმტკიცდება.

⁶ნუ გამშვენდები მეფის წინაშე და დიდებულთა ადგილზე ნუ დადგები,

⁷რადგან სჯობს გითხრან: “ამოდი აქ”, ვიდრე დაგამცირონ კეთილშობილის წინაშე, რომელიც იხილეს შენმა თვალებმა.

⁸ნუ ჩაერევი დავაში სწრაფად, რადგან რას გააკეთებ ბოლოს, როცა შეგარცხვენს შენი მეზობელი?

⁹იდავე შენი დავა შენს მეზობელთან, მაგრამ სხვის საიდუმლოს ნუ გაამჟღავნებ,

¹⁰რათა არ შეგიზიზღოს გამგონემ, და შენი ცილისწამება არ მოგიბრუნდეს.

¹¹წესიერად ნათქვამი სიტყვა ვერცხლით მოვარაყებული ოქროს ვაშლებია.

¹²როგორც ოქროს ბეჭედი და ბაჯაღლოს სამკაული, ისეა ბრძნული გაკიცხვა ყურადღებიანი ყურისათვის.

¹³როგორც თოვლის სიგრილეა მკის დღეს, ისე სანდოა მსტოვარი მისი გამომგზავნელისათვის, და თავისი ბატონის სულს მოაბრუნებს.

¹⁴კაცი, მოტრაბახე ტყუილი საჩუქრით უწვიმო ღრუბელი და ქარია.

¹⁵მოთმინებით მოდრკება მთავარი, და რბილი ენა ძვალს დაამსხვრევს.

¹⁶ჰპოვე თაფლი? ჭამე, რამდენიც გჭირდება, თორემ გაძღები და ამოარწყევ.

¹⁷დააძვირე შენი ფეხი შენი მოყვასის სახლში, თორემ მოყირჭდები და შეგიძულებს.

¹⁸კომბალი, მახვილი და ბასრი ისარია კაცი - დამამოწმებელი ცრუ მოწმობისა თავისი მოყვასისათვის.

¹⁹უვარგისი კბილი და ნაღრძობი ფეხი მოღალატის საყრდენია უბედურების დღეს.

²⁰რაც ტანსაცმლის გამხდელია ცივ დღეს, რაც ძმარია ტუტეზე, ისაა სიმღერის მომღერალი ნაღვლიან გულზე.

²¹თუ შენი მტერი მშიერია, დააპურე იგი და, თუ სწყურია, შეასვი წყალი,

²²რადგან ნაკვერცხლებს აგროვებ მის თავზე და უფალი მოგიზღავს შენ.

²³ჩრდილოეთის ქარი წვიმას წარმოქმნის და ფარული ენა - მრისხანე სახეს.

²⁴ბინის კუნჭულში ცხოვრება სჯობს ანჩხლ ქალთან საერთო სახლში ცხოვრებას.

²⁵რაც ცივი წყალია დაღლილი სულისათვის, ისაა კარგი ამბავი შორი ქვეყნიდან.

²⁶მართალი, უკეთურის წინაშე დაცემული, არის როგორც ატალახებული წყარო და მოოხრებული სათავე.

²⁷ბევრი თაფლის ჭამა არაა კარგი, და სხვისი ღირსების ჩხრეკა არ არის ღირსება.

²⁸უგალავნო დანგრეული ქალაქია კაცი, რომელიც თავის სულს ვერ იოკებს.