Read სბს–სტოკჰოლმი 2001 იგავნი სოლომონისა 26 Bible Online

იგავნი სოლომონისა 26 - სბს–სტოკჰოლმი 2001 bible

იგავნი სოლომონისა 26

¹როგორც თოვლი ზაფხულში და როგორც წვიმა მკის დროს, ისე უსარგებლოა ბრიყვისათვის ღირსება.

²როგორც ჩიტის ქროლვა, როგორც ბეღურის ფრენა, ისე არ მოეწევა დაუმსახურებელი წყევლა.

³მათრახი ცხენისათვის, აღვირი ვირისათვის, და შოლტი ბრიყვთა ზურგისათვის.

⁴ნუ უპასუხებ ბრიყვს მისი სისულელისამებრ, რათა შენც არ დაემსგავსო მას.

⁵უპასუხე ბრიყვს მის სისულელისამებრ, თორემ ბრძენი ეგონება თავი.

⁶იგი ფეხებს იჭრის, სვამს ძალადობას, ვინც ამბავს აგზავნის ბრიყვის ხელით.

⁷როგორც კოჭლის წვივებია სუსტი, ისევეა იგავი ბრიყვთა პირში.

⁸როგორც შურდულზე გამოსაბმელი ქვა, ისეა ბრიყვის პატივისმცემელი.

⁹როგორც ნარშავი, მთვრალის ხელში მოხვედრილი, ისეა იგავი ბრიყვთა პირში.

¹⁰როგორც მოისარი, ყველას გამგმირავი, ისეა ბრიყვისა და გამვლელის დამქირავებელი.

¹¹როგორც ძაღლი უბრუნდება თავის ნარწყევს, ბრიყვი იმეორებს თავის სისულელეს.

¹²გინახავს კაცი, ბრძენი რომ იყოს საკუთარ თვალში? ბრიყვს მასზე მეტი იმედი აქვს.

¹³ზარმაცი ამბობს: “ლომია გზაზე, ლომია ქუჩებს შორის”.

¹⁴კარი თავის ანჯამაზე ბრუნავს, ხოლო ზარმაცი თავის საწოლზე.

¹⁵ზარმაცი ლანგარში ჰყოფს თავის ხელს, ეძნელება პირთან მიტანა.

¹⁶ზარმაცი საკუთარ თვალში შვიდ ბრძენზე ბრძენია, რომელნიც დაფიქრებულად პასუხობენ.

¹⁷გინდა ძაღლი ყურით დაუჭერია გამვლელს, გინდა გაფიცხებულა ჩხუბზე, რომელიც მას არ ეხება.

¹⁸როგორც თავის მომგიჟიანებელი, რომელიც ისვრის ნაპერწკლებს, ისრებს და სიკვდილს,

¹⁹ისეა კაცი, რომელიც ატყუებს თვის მოყვასს და ამბობს: “მე ხომ ვხუმრობ”.

²⁰უშეშოდ ქრება ცეცხლი, ხოლო უცილისმწამებლოდ დაცხრება შუღლი.

²¹როგორც ნახშირი ნაკვერცხლისათვის და შეშა ცეცხლისათვის, ისეა ანჩხლი კაცი ჩხუბის გასაღვივებლად.

²²ცილისმწამებლის სიტყვები განმგმირავია და გულის სიღრმეში აღწევენ ისინი.

²³როგორც წიდიანი ვერცხლი ფარავს თიხის ჭურჭელს, ისეა ანთებული ტუჩები და ბოროტი გული.

²⁴ტუჩებით თავს მოაჩვენებს მოძულე, გუნებაში კი მზაკვრობას განიზრახავს.

²⁵როდესაც გაანაზებს თვის ხმას, ნუ ერწმუნები მას, რადგან შვიდი სისაძაგლეა მის გულში.

²⁶ვისი სიძულვილიც პირფერობით იფარება, მისი სიბოროტე კრებულში გამომჟღავნდება.

²⁷ვინც ორმოს თხრის, თავად ჩავარდება მასში, ხოლო ვინც ქვას დააგორებს, მასვე დაუბრუნდება იგი.

²⁸ცრუ ენას სძულს მის მიერ დატანჯულნი და მლიქვნელი პირი დამხობას ამზადებს.