Read სბს–სტოკჰოლმი 2001 იგავნი სოლომონისა 27 Bible Online

იგავნი სოლომონისა 27 - სბს–სტოკჰოლმი 2001 bible

იგავნი სოლომონისა 27

¹ნუ იქებ თავს ხვალინდელი დღით, რადგანაც არ იცი, რას დაბადებს დღე.

²უცხომ გაქოს შენ და არა შენმა პირმა, უცხოტომელმა - და არა შენმა ბაგეებმა.

³მძიმეა ქვა და ტვირთია ქვიშა, ხოლო სულელის სიბრაზე ორივეზე მძიმეა.

⁴გულისწყრომა სისასტიკეა, ხოლო რისხვა - ნიაღვარი, მაგრამ მოშურნეობას წინ ვინ დაუდგება?

⁵აშკარა მხილება სჯობს დაფარულ სიყვარულს.

⁶სარწმუნოა ჭრილობები მოყვრისაგან და მრავალია ამბორი მოძულესაგან.

⁷მაძღარი სული გოლეულსაც თელავს, ხოლო მშიერი სულისათვის ყოველი მწარე ტკბილია.

⁸როგორც ჩიტი, დამტოვებელი თავისი ბუდისა, ისეა კაცი, დამტოვებელი თავისი ადგილისა.

⁹ზეთი და საკმეველი ახარებს გულს, ხოლო მეგობრის სიტკბო გულითად რჩევაშია.

¹⁰შენს მეგობარს და მამაშენის მეგობარს ნუ მიატოვებ, და შენი ძმის სახლში ნუ მიხვალ შენი უბედურების დღეს. ახლო მეზობელი სჯობს დაშორებულ ძმას.

¹¹დაბრძენდი, შვილო, და გაახარე ჩემი გული და მე მოვიგერიებ ჩემს მაგინებელთ.

¹²გონიერი ხედავს ბოროტს და იმალება, ხოლო გულუბრყვილონი ჩაივლიან და ისჯებიან.

¹³აიღე მისი ტანსაცმელი, რადგან უცხოს დაუდგა თავდებად, და უცხოტომელის წილად გამოართვი გირაო.

¹⁴თუ ვინმე თვის მოყვასს აკურთხებს ხმამაღლა დილაადრიან, წყევლად ჩაეთვლება მას.

¹⁵წვიმიან დღეს შემაწუხებელი წვეთები და ანჩხლი ცოლი მსგავსნი არიან.

¹⁶მისი დამკავებელი აკავებს ქარს და მისი მარჯვენა ზეთს იჭერს.

¹⁷რკინა რკინას ლესავს, კაცი კი ლესავს თვისი მოყვასის სახეს.

¹⁸ვინც ლეღვს უფრთხილდება, შეჭამს მის ნაყოფს, ხოლო ვინც თვის ბატონს იცავს, პატივცემული იქნება.

¹⁹როგორც წყალშია სახე სახესთან, ისეა გული ადამიანისა ადამიანთან.

²⁰შავეთი და ჯოჯოხეთი ვერ გაძღება და ვერც ადამიანის თვალი გაძღება.

²¹სახმილი ვერცხლისთვისაა და ბრძმედი ოქროსათვის, ხოლო ადამიანი მისი ქება-დიდებისამებრ გამოიცდება.

²²ფილთაქვითაც რომ ნაყო როდინში სულელი ბურღულს შორის, არ მოსცილდება მისი სისულელე.

²³ცნობით იცნობდე შენი ცხვრის სახეს, გული დაუდე ფარას,

²⁴რადგან საუკუნოდ არაა სიმდიდრე და არც გვირგვინი გადავა თაობიდან თაობაში.

²⁵ამოიწვერა ბალახი და გამოჩნდა ჟიჟო და შეაგროვებენ მთების მცენარეებს,

²⁶იქნებიან ცხვრები შენი სამოსელისათვის და თხები მინდვრის საფასურისათვის,

²⁷და თხების რძე შენი საკმარისი იქნება საკვებისათვის, შენი სახლეულის საკვებისათვის და შენი მოახლეების სარჩენად.