Read სბს–სტოკჰოლმი 2001 იგავნი სოლომონისა 31 Bible Online

იგავნი სოლომონისა 31 - სბს–სტოკჰოლმი 2001 bible

იგავნი სოლომონისა 31

¹სიტყვანი მეფე ლემუელისა, მისნისა, რომლითაც წვრთნიდა დედა მისი:

²რაო, ჩემო შვილო, რაო, შვილო ჩემი მუცლისა? და რაო, შვილო ჩემი აღთქმებისა?

³ნუ მისცემ დედაკაცებს შენს ძალას და შენს გზებს - მეფეთა დამღუპველებს!

⁴მეფეებს არ შეეფერებათ, ლემუელ, მეფეებს არ შეეფერებათ ღვინის სმა, და არც მთავრებს შეეფერებათ მაგარ სასმელთა სიყვარული,

⁵რათა არ სვამდეს და არ ივიწყებდეს კანონებს, არ ამრუდებდეს ჩაგრულთა სამართალს.

⁶მიეცით მაგარი სასმელი მომაკვდავს და ღვინო - სულით გამწარებულს.

⁷მან დალიოს და დაივიწყოს თვისი სიღარიბე და თავისი ტანჯვა აღარ გაიხსენოს!

⁸გახსენი შენი პირი მუნჯისათვის, წარმავლობის ძეთა სამართლისათვის,

⁹გაუხსენი პირი მართლმსაჯულებას და განიკითხე გლახაკი და უპოვარი.

¹⁰მარჯვე ცოლს ვინ ჰპოვებს? მარგალიტებზე მაღალია მისი ფასი.

¹¹ერწმუნება მას მისი მეუღლის გული და შემოსავალი არ დააკლდება.

¹²ის სიკეთეს მიუზღავს მას და არა სიბოროტეს მთელი მისი ცხოვრების დღეებში.

¹³მატყლს და სელს შოულობს იგი და ბეჯითად შრომობს საკუთარი ხელებით.

¹⁴სავაჭრო ხომალდების მსგავსია იგი და შორიდან მოაქვს თავისი პური.

¹⁵დგება ჯერ კიდევ ღამიანად და საკვებს ურიგებს თავის სახლს და ულუფას - თავის მხევალთ.

¹⁶გაიფიქრებს მინდორზე და იძენს მას, თავის ხელთა ნაყოფით გააშენებს ვენახს.

¹⁷ძალას შემოირტყამს წელზე და იმაგრებს მკლავებს.

¹⁸ხვდება, რომ კარგია მისი ჭირნახული, ღამით არ ქრება მისი სანთელი.

¹⁹იწვდენს ხელს სართავი ჯარისაკენ და მის ხელებს უპყრიათ თითისტარი.

²⁰თავის ხელისგულს უშლის ღარიბს და ხელებს უწვდენს უპოვარს.

²¹არ შიშობს იგი თავის სახლზე თოვლიანობისას, რადგან მთელი მისი სახლი შემოსილია ძოწისფერი ქსოვილით.

²²ის ფარდაგებს იკეთებს თავისთვის, ბისონი და მეწამულია მისი სამოსელი.

²³ცნობილია მისი ქმარი ქალაქის კარიბჭეებთან, ქვეყნის უხუცესებთან ჯდომისას.

²⁴ტილოს ტანსაცმელს კერავს და ყიდის, და სარტყლებს აძლევს ვაჭარს.

²⁵ძალა და ღირსება მისი სამოსელია და უღიმის იგი მომავალ დღეს.

²⁶პირს ხსნის იგი სიბრძნით და წყალობის რჯულია მის ენაზე.

²⁷თვალყურს ადევნებს თავისი სახლის გზებს და სიზარმაცის პურს არ ჭამს.

²⁸დგებიან მისი შვილები ლოცავენ მას, მისი ქმარიც და - აქებს მას:

²⁹‘მრავალმა ასულმა მიაღწია წარმატებას, მაგრამ შენ ყველას გადააჭარბე!’

³⁰მაცდურია მშვენიერება და ამაოა სილამაზე, უფლის მოშიში ქალი კი ქებულია.

³¹მიეცით მას მის ხელთა ნაყოფისაგან და მისი საქმეები განადიდებენ მას კარიბჭეებთან.