Read სბს–სტოკჰოლმი 2001 იგავნი სოლომონისა 6 Bible Online

იგავნი სოლომონისა 6 - სბს–სტოკჰოლმი 2001 bible

იგავნი სოლომონისა 6

¹შვილო ჩემო, თუ თავდებად დაუდექი შენს მოყვასს, ხელი ხელზე დაურტყი უცხოს,

²ბადეში გაები შენი პირის ნათქვამით, შეპყრობილი ხარ შენი პირის ნათქვამით.

³ასე მოიქეცი, შვილო ჩემო და გადარჩები, თუ ხელში ჩაუვარდი შენს მოყვასს: წადი, ემთხვიე და ევედრე მოყვასს.

⁴ნუ მიაკარებ ძილს შენს თვალებს და რულს შენს ქუთუთოებს,

⁵გადაირჩინე თავი, ვით ქურციკმა მონადირის ხელიდან და ფრინველმა - ფრინველთმჭერის ხელიდან.

⁶წადი ჭიანჭველასთან, ზარმაცო, ნახე მისი გზები და დაბრძენდი.

⁷არა ჰყავს მას არც უფროსი, არც ზედამხედველი და არც ბატონი.

⁸იმზადებს ზაფხულში თავის პურს, აგროვებს მკის დროს თავის საზრდოს.

⁹როდემდე იწვები, ზარმაცო, როდის ადგები შენი ძილიდან?

¹⁰ცოტა ძილი, ცოტა თვლემა, ცოტა გულხელდაკრეფა დასაწოლად,

¹¹და მოვა, როგორც მგზავრი, შენი სიღატაკე და გაჭირვება, როგორც ჯარისკაცი.

¹²არამზადა ადამიანი, უსამართლო კაცი დადის მრუდი პირით,

¹³თვალს ჩაუკრავს, გაუხახუნებს ფეხს, ანიშნებს თავისი თითებით.

¹⁴უმტკიცობაა მის გულში, ბოროტს განიზრახავს ყოველ ჟამს, განხეთქილებას თესავს.

¹⁵ამის გამო უეცრად მოვა მისი დაღუპვა, უცბად დაილეწება და არ ექნება მას კურნება.

¹⁶ექვსი რამ სძულს უფალს და შვიდი რამ ეზიზღება:

¹⁷ზვიადი თვალები, მატყუარა ენა, ხელები, უდანაშაულო სისხლის დამღვრელნი,

¹⁸გული - ბოროტი განზრახვების განმზრახველი, ფეხნი - სწრაფად მორბენალნი ბოროტებისაკენ,

¹⁹ცრუ მოწმე, მზაკვრობის წარმომთქმელი და განხეთქილების დამთესავი ძმათა შორის.

²⁰დაიცავი, შვილო ჩემო, მამაშენის მცნებანი და დედაშენის სწავლებას ნუ მიატოვებ.

²¹დაიბნიე შენს გულზე სამუდამოდ, შეიბნიე შენს ყელზე.

²²სიარულისას წინ წარგიძღვება, დაწოლისას დაგიფარავს, გამოღვიძებისას საუბარს დაგიწყებს.

²³რადგან მცნება სანთელია და მოძღვრება - სინათლე, ცხოვრების გზა კი - დამრიგებლური შეგონება.

²⁴რათა დაგიფაროს შენ ბოროტი ქალისაგან, უცხოელის ლაქარდიანი ენისაგან.

²⁵ნუ ისურვებ მის სილამაზეს შენს გულში და ნუ გაგიტაცებს თავისი წამწამების ხამხამით.

²⁶რადგან მეძავი ქალის მიზეზით მათხოვრდებიან ლუკმა პურამდე; ქმრიანი კი შენს ძვირფას სულს ინადირებს.

²⁷განა შეხვეტს ვინმე ცეცხლს თავის უბეში ტანსაცმელის დაუწველად?

²⁸თუ გაივლის ვინმე ნაკვერცხლებზე, ფეხების დაუწველად?

²⁹ასევეა თავისი მოყვასის ცოლთან მიმსვლელიც, არავინ გამართლდება მისი მიმკარებელი.

³⁰არ შეიზიზღებენ ქურდს, თუ იპარავს გაძღომისათვის, როდესაც მშიერია.

³¹მაგრამ თუ იპოვნიან, შვიდმაგად გადაიხდის, თავისი სახლის მთელ ქონებას მისცემს.

³²ვინც ქალთან მრუშობს, უგუნურია. სპობს თავის სულს, ვინც ამას სჩადის.

³³ცემასა და დამცირებას ჰპოვებს და მისი სირცხვილი არ წაირეცხება.

³⁴რადგან ეჭვიანობა მამაკაცის გულისწყრომაა, და არ დაინდობს ის შურისგების დღეს.

³⁵არ შეხედავს არავითარ გამოსასყიდს და არ დაკმაყოფილდება, რაც უნდა უმრავლო ქრთამი.