Read სბს–სტოკჰოლმი 2001 იგავნი სოლომონისა 7 Bible Online

იგავნი სოლომონისა 7 - სბს–სტოკჰოლმი 2001 bible

იგავნი სოლომონისა 7

¹შვილო ჩემო, შეინახე ჩემი ნათქვამი და ჩემი მცნებანი ჩაიმარხე შენში.

²შეინახე ჩემი მცნებანი და ჩემი რჯული როგორც თვალისჩინი.

³დაიბნიე იგი შენ თითებზე, დაიწერე შენი გულის ფიცარზე.

⁴სიბრძნეს უთხარი: “ჩემი და ხარ შენ,” და ნათესავი უწოდე გონებას,

⁵რათა დაგიფაროს უცხო ქალისაგან, უცხოელისაგან, რომლის სიტყვა ლაქარდიანია.

⁶რადგან ჩემი სახლის სარკმლიდან, ჩემი დარაბიდან გავიჭვრიტე,

⁷და ვიხილე ბრიყვნი, ვაჟებს შორის შევნიშნე უგუნური ყმაწვილი,

⁸გადამავალი ქუჩაზე, მისი სახლის კუთხესთან. და წავიდა იგი მისი სახლისკენ

⁹საღამოს მწუხრში, ღამის სიბნელესა და წყვდიადში.

¹⁰და აჰა, გამოდის ქალი მის შესახვედრად, მეძავის სამოსელში და მზაკვრული გულით.

¹¹აღვირახსნილია ის და თავშეუკავებელი, ფეხები სახლში არ უჩერდება:

¹²ხან ქუჩაშია, ხან მოედნებზე და ყოველ კუთხესთან უსაფრდება.

¹³აჰა, დაიჭირა და ჰკოცნის მას და ურცხვი სახით ეუბნება:

¹⁴“სამშვიდობო მსხვერპლი იყო ჩემზე. დღეს შევასრულე ჩემი აღთქმული,

¹⁵ამის გამო გამოვედი შენს შესახვედრად, შენი სახის საძებრად და გიპოვე!

¹⁶ფარდაგებით მოვფინე ჩემი სარეცელი, ეგვიპტის ნაქარგი ქსოვილით,

¹⁷ჩემს საწოლს მური ვაპკურე, ალოე და კინამო.

¹⁸შემოდი, გავძღეთ დილამდე სიყვარულით, ვიხაროთ ალერსით!

¹⁹რადგან ჩემი ქმარი შინ არ არის, შორ გზაზე წავიდა,

²⁰ფულით სავსე ქისა აიღო ხელში და მხოლოდ სავსე მთვარისას დაბრუნდება შინ.”

²¹და აცდუნა თავისი მრავალი სიტყვით, თავისი მლიქვნელი ბაგით მოხიბლა იგი.

²²მაშინვე გაჰყვა უკან, როგორც ხარი დასაკლავად რომ მიდის, და როგორც ბრიყვი ბორკილებში - დასასჯელად,

²³სანამ ისარი არ დასჭრის მის ღვიძლს, ფრინველივით იჩქარის მახისაკენ და არ იცის, რომ თავს იღუპავს.

²⁴ახლა კი, შვილებო, მომისმინეთ მე და ყური დაუგდეთ ჩემი პირის ნათქვამს:

²⁵არ მიბრუნდეს შენი გული მისი გზებისაკენ, ნუ იხეტიალებ მის ბილიკებზე,

²⁶რადგან მრავალი განგმირული დასცა მან და რიცხვი არა აქვს მის მიერ დახოცილთ.

²⁷მისი სახლი შავეთის გზებია, მკვდართა სავანეში ჩამავალი.