Read სბს–სტოკჰოლმი 2001 იგავნი სოლომონისა 9 Bible Online

იგავნი სოლომონისა 9 - სბს–სტოკჰოლმი 2001 bible

იგავნი სოლომონისა 9

¹სიბრძნემ სახლი აიშენა თავისთვის, გამოთალა მისი შვიდი სვეტი,

²დაკლა საკლავი, ღვინო შეაზავა და სუფრა გააწყო.

³დაგზავნა თავისი მხევალნი, მოუწოდა ქალაქის მაღლობთა წვერიდან:

⁴“ვინც ბრყვია, აქეთ შემოუხვიოს”! უგუნურს უთხრა მან:

⁵“მოდით, ჭამეთ ჩემი პური და სვით ღვინო, ჩემი შეზავებული.

⁶დატოვეთ სიბრიყვე და იცოცხლეთ და იარეთ გონიერების გზით.”

⁷მქირდავის დამრიგებელი დამცირებას იღებს და უკეთურების მამხილებელი - შეურაცხყოფას თავის თავზე.

⁸ნუ ამხილებ მქირდავს, რათა არ შეგიძულოს. ამხილე ბრძენი და შეგიყვარებს.

⁹მიეცი ბრძენს ცოდნა და უფრო დაბრძენდება, ასწავლე მართალს და გაიმრავლებს ცოდნას.

¹⁰სიბრძნის დასაბამი უფლის შიშია და წმიდის შეცნობა - გონიერება.

¹¹რადგან ჩემით გამრავლდება შენი დღეები და სიცოცხლის წლები შეგემატება.

¹²თუ დაბრძენდი, შენთვის დაბრძენდი, და თუ მქირდავი ხარ, მარტო იტვირთავ.

¹³სულელი ქალი, ბრიყვი, ხმაურიანი და არაფრის მცოდნე,

¹⁴ჯდება თავისი სახლის ზღურბლთან, სკამზე ქალაქის მაღლობზე,

¹⁵რათა დაუძახოს გზაზე ჩამვლელთ, სწორად მავალთ თავიანთი გზით:

¹⁶“ვინც ბრიყვია, გადმოუხვიოს აქეთ”, ჭკუანაკლულს კი ეუბნება:

¹⁷“მოპარული წყალი ტკბილია და ჩუმად შეჭმული პური - საამური.”

¹⁸მან არ იცის, რომ მკვდრები არიან იქ, შავეთის სიღრმეში არიან მისი წვეულნი.