Read სბს–სტოკჰოლმი 2001 ეკლესიასტე 10 Bible Online

ეკლესიასტე 10 - სბს–სტოკჰოლმი 2001 bible

ეკლესიასტე 10

¹მკვდარი ბუზი ამყრალებს, ადუღებს მენელსაცხებლის ზეთს. მცირე სიბრიყვე გადასწონის სიბრძნესა და ღირსებას.

²ბრძენის გული მარჯვნივაა მიმართული, ბრიყვის გული კი - მარცხნივ.

³და გზაზეც, რომლითაც ბრიყვი მიდის, გულისყური აკლია მას და თითქოს ყველას ეუბნება, რომ სულელია.

⁴თუ ბატონის რისხვა აენთება შენზე, ნუ მიატოვებ შენს ადგილს, რადგან სიმშვიდე ფარავს დიდ ცოდვებს.

⁵არის ბოროტება, რომელიც ვიხილე მზის ქვეშ, როგორც შეცდომა, რომელიც გამოდის ხელმწიფისაგან:

⁶სიბრიყვე მოთავსდა დიდ სიმაღლეებში, მდიდარნი კი მდაბლად სხედან.

⁷ვიხილე მონები ცხენებზე, მთავარნი კი მონებივით მავალნი მიწაზე.

⁸ორმოს ამომთხრელი მასში ჩავარდება, ზღუდის გამანგრეველს კი გველი უკბენს.

⁹ქვების მომპოვებელი მათგან დაზიანდება, ხეთა გამპობს მათგან აქვს საფრთხე.

¹⁰თუ ცული დაბლაგვდა და პატრონმა არ გაულესა პირი, მაშინ ძალა უნდა მოიკრიფოს. უპირატესობა სიბრძნისა წარმატებაშია.

¹¹თუ უკბენს გველი თილისმის შელოცვამდე, შემლოცავს არა აქვს უპირატესობა.

¹²სიტყვანი ბრძენი პირისა მოსაწონია, ბრიყვის ბაგენი კი მასვე გადაყლაპავენ.

¹³მისი პირის ნათქვამის დასაწყისი სიბრიყვეა, მისი პირის დასასრული კი - ავი სიბრიყვე.

¹⁴ბრიყვი გაამრავლებს სიტყვებს, ადამიანმა არ იცის რა იქნება, და მის შემდეგ რა იქნება, ვინ ეტყვის მას?

¹⁵ბრიყვთა შრომა ქანცავს მას, ვინც არც კი იცის, ქალაქის გზა.

¹⁶ვაი შენ, ქვეყანავ, მეფედ ყრმა რომ გყავს, შენი მთავარნი კი დილიდანვე ჭამენ.

¹⁷ნეტარება შენ, ქვეყანავ, რომ შენი მეფე დიდებულთა ძეა, ხოლო შენი მთავრები თავის დროზე ჭამენ ძალ-ღონის მოსაკრებად და არა სათრობად.

¹⁸სიზარმაცის გამო ჭერი ჩამოიწევს და ხელების დაკრეფით სახლში წვეთავს.

¹⁹გასართობად აწყობენ სერობას, და ღვინო ამხიარულებს ცხოვრებას, ვერცხლი კი ყველაფერს პასუხობს.

²⁰შენს ფიქრებშიც კი ნუ დასწყევლი მეფეს, და შენს საწოლ ოთახში ნუ დასწყევლი მდიდარს, რადგან ცის ფრინველი მიუტანს ამ ამბავს და ფრთოსანი მოუთხრობს შენს სიტყვას.