Read სბს–სტოკჰოლმი 2001 ეკლესიასტე 6 Bible Online

ეკლესიასტე 6 - სბს–სტოკჰოლმი 2001 bible

ეკლესიასტე 6

¹არის ბოროტება, რომელიც ვიხილე მზის ქვეშ და გვხვდება ადამიანთა შორის:

²ზოგიერთ კაცს ღმერთი აძლევს სიმდიდრეს და ქონებას და პატივს და არაფერს არ აკლებს მის სულს ყოველივედან, რასაც ისურვებს, მაგრამ ღმერთი მას არ აძლევს ძალას, რომ ისარგებლოს ყველაფრით ამით. ეს ამაოება და ავი სატკივარია.

³თუ კაცმა შვა ასი შვილი და მრავალ წელს იცოცხლა, რა ბევრიც არ უნდა იყოს, თუ მისი სული სიკეთით არ გამძღარა და საფლავიც არ ეღირსა, მე ვიტყვი: “დაუბადებელიც მასზე ბედნიერია!

⁴რადგან ამაოებაში მოვიდა და ბნელში წავა და ბნელში დაიფარება მისი სახელი.

⁵მზე არც უნახავს და არც გაუგია. ამას მეტი შვება აქვს, ვიდრე იმას.

⁶და ათასი წელიც რომ ეცხოვრა ორჯერ და სიკეთე არ ეხილა, განა ყოველივე ერთ ადგილას არ მიდის?”

⁷ადამიანის მთელი შრომა მისი პირისთვისაა, მაგრამ სული არ ივსება.

⁸რადგან რა უპირატესობა აქვს ბრძენს ბრიყვის წინაშე? და რა - ღარიბს, რომელმაც იცის ცოცხალთა წინ სიარული?

⁹სჯობს თვალით ნანახი სულის ნაოცნებარს. ესეც ამაოება და ქარის დევნაა.

¹⁰რაც იყო, მას უკვე ეწოდა სახელი და ცნობილია, რა არის ადამიანი, რადგან ვერ შეძლებს თავისზე ძლიერთან დავას.

¹¹მართლაც არსებობს ბევრი საგანი, რომელიც ამრავლებს ამაოებას. რა სარგებელი აქვს ადამიანს?

¹²რადგან ვინ იცის, რა არის კარგი ადამიანისათვის ცხოვრებაში, მისი ამაო ცხოვრების დათვლილ დღეებში, რომელთაც ის ატარებს ჩრდილივით? და ვინ ეტყვის ადამიანს, რა იქნება მის შემდეგ მზის ქვეშ?