Read სბს–სტოკჰოლმი 2001 ეკლესიასტე 8 Bible Online

ეკლესიასტე 8 - სბს–სტოკჰოლმი 2001 bible

ეკლესიასტე 8

¹ვინაა მსგავსი ბრძენისა და ვინ შეიცნობს საგანთა არსს? ადამიანის სიბრძნე ანათებს მის სახეს და ცვლის მისი სახის სიმკაცრეს.

²“დაიცავი-მეთქი მეფის ბრძანება ღვთისადმი ფიცის გამო.

³ნუ იჩქარებ მისგან წასვლას, ნუ დადგები ბოროტ საქმეში, რადგან რასაც ის მოისურვებს, გააკეთებს.”

⁴ვინაიდან მეფის სიტყვა ხელმწიფებაა და ვინ ეტყვის მას: “რას აკეთებ?”

⁵მცნების დამცველმა არ იცის ბოროტი საქმე, ჟამი და სამართალი კი იცის ბრძენის გულმა.

⁶რადგან ყოველ საქმეს თავისი ჟამი და წესი აქვს, მაგრამ ადამიანს მძიმედ აწევს უბედურება.

⁷რადგან არავინ იცის, რაც იქნება, რადგან როგორ მოხდება, ვინ ეტყვის მას?

⁸ადამიანი არაა ქარის ხელისუფალი, რომ დააკავოს ქარი, და ხელმწიფება არ არის სიკვდილის დღეზე, და მოციქულობა არ არის ომში და უკეთურება ვერ გადაარჩენს თავის პატრონს.

⁹ყოველივე ეს ვიხილე და ჩემი გული დავუდე ყოველ საქმეს, რაც მზის ქვეშ ხდება, როდესაც ადამიანი ბატონობს ადამიანზე მის საბოროტოდ.

¹⁰და ამასთან ვიხილე მე დამარხული უკეთურნიც, და წმიდა ადგილიდან მოდიოდნენ და მიდიოდნენ, და დავიწყებას მიეცნენ ქალაქში, სადაც ასე იქცეოდნენ. ესეც ამაოებაა.

¹¹სადაც სწრაფად არ ისჯება ბოროტი, ადამიანის გული ბოროტებით ივსება.

¹²თუმცა ცოდვილი ასჯერ ჩაიდენს ბოროტებას, ღმერთი დიდხანს უთმენს მას. სიკეთე ექნებათ ღვთის მოშიშთ, ვინაიდან მოიშიშებენ მის წინაშე.

¹³სიკეთე არ ექნება უკეთურს და ჩრდილივით ხანმოკლე იქნება მისი დღეები, ვინაიდან არ მოიშიშებს ღვთის წინაშე.

¹⁴არის ამაოება, რომელიც ხდება მიწაზე: არიან მართალნი, რომელთაც მიეზღვებათ უკეთურთა მოქმედებისამებრ და არიან უკეთურნი, რომელთაც მიეზღვებათ მართალთა მოქმედებისამებრ. მე ვთქვი, რომ ესეც ამაოებაა.

¹⁵და ვაქე მე სიხარული, რადგან არაფერია უკეთესი ადამიანისათვის მზის ქვეშ, ვიდრე ჭამა და სმა და მხიარულება. და ეს თან ახლავს მას შრომაში მთელი სიცოცხლე, რომელიც მისცა მას ღმერთმა მზის ქვეშ.

¹⁶და როდესაც დავუდე გული, რომ შემეცნო სიბრძნე და მეხილა ის საქმე, რომელიც მიწაზე ხდება, რისთვისაც ვერც დღისით და ვერც ღამით თვალით ვერ ხედავს ძილს,

¹⁷ვიხილე ღვთის ყოველი საქმე, მაგრამ ადამიანს არ ძალუძს მისწვდეს საქმეს, რომელიც მზის ქვეშ ხდება: რამდენიც არ უნდა ეცადოს ადამიანმა, ვერ მისწვდება. და კიდევაც რომ იფიქროს ბრძენმა, რომ იცის, ვერ შეძლებს მიწვდომას.