Read სბს–სტოკჰოლმი 2001 ქებათა-ქება სოლომონისა 1 Bible Online

ქებათა-ქება სოლომონისა 1 - სბს–სტოკჰოლმი 2001 bible

ქებათა-ქება სოლომონისა 1

¹ქებათა ქება სოლომონისა.

²“მეამბოროს თავისი ბაგეების ამბორით, რადგან ღვინოზე ტკბილია შენი ალერსი!

³სურნელოვანია შენი ნელსაცხებელი, და თავად სახელი შენი დაღვრილი ნელსაცხებელია. ამის გამო უყვარხარ ქალწულებს.

⁴თან წარმიტაცე და ერთად გავიქცეთ. მეფემ შემიყვანა თავის პალატებში.” “ვიხარებდით და ვიშვებდით შენით, ვაქებდით შენს ალერსს ღვინოზე მეტად. ღირსად შეგიყვარეს შენ!”

⁵“შავი ვარ, მაგრამ მშვენიერი, ასულნო იერუსალიმისა! ვით კედარის კარავნი და ვით სოლომონის კრეტსაბმელნი.

⁶ნუ უყურებთ, რომ შავი ვარ, რომ მზისგანა ვარ დამწვარი. დედაჩემის ძენი შემომწყრნენ, დამადგინეს ვენახის მცველად, ჩემი ვენახი კი ვერ დავიცავი.

⁷მითხარი, ჩემი სულის შეყვარებულო, სად აძოვებ, სად ისვენებ შუადღისას, რისთვის ვიხეტიალო შენი მეგობრების ჯოგებში?”

⁸“თუ ვერ სცნობ, უმშვენიერესო ასულთა შორის, გაჰყევი ცხვრის კვალს და მწყემსთა ბინების შორიახლო აძოვე შენი თიკნები.

⁹ჩემს ულაყს, ფარაონის ეტლში შეკაზმულს, გამსგავსე შენ, სატრფოვ ჩემო!

¹⁰მშვენიერია შენი ღაწვები, მძივებით შემკულნი, და ყელი - ყელსაბამით მორთული.”

¹¹“ოქროს საყურეებს გაგიკეთებთ, ვერცხლით დაწინწკლულებს.”

¹²“ვიდრემდის ინახით იჯდა მეფე, სურნელსა ფშვენდა ჩემი ნარდიონი.

¹³მურის ჭურჭელი - საყვარელი ჩემი ჩემთანაა, ჩემს ძუძუთა შორის განისვენებს.

¹⁴ქოფერის მტევანია ჩემთვის ჩემი საყვარელი ენგადის ვენახებში.”

¹⁵“აჰა, მშვენიერი ხარ, სატრფოვ ჩემო, აჰა, მშვენიერი ხარ! მტრედებია შენი თვალები.”

¹⁶“აჰა, მშვენიერი ხარ, საყვარელო ჩემო, და სანატრელი! რა მწვანეა ჩვენი სარეცელი!

¹⁷კოჭები ჩვენი სახლისა ნაძვისაა, ჭერი - კვიპაროსის.”