Read სბს–სტოკჰოლმი 2001 ესაია 1 Bible Online

ესაია 1 - სბს–სტოკჰოლმი 2001 bible

ესაია 1

¹ხილვა ესაიასი, ამოცის ძისა, რომელიც იხილა იუდასა და იერუსალიმის შესახებ, იუდას მეფეების - ყუზიაჰუს, იოთამის, ახაზის, ხიზკიაჰუს მეფობის დღეებში:

²ისმინეთ ცანო და ყური დაუგდე, ქვეყანავ, რადგან უფალი ლაპარაკობს: “ძენი გავზარდე მე და აღვამაღლე, მათ კი მიმუხთლეს მე.

³ხარი იცნობს თავის მფლობელს და ვირი - ბაგას თავისი პატრონისას, ისრაელი კი არ მიცნობს მე, ჩემს ხალხს გაგება არა აქვს.

⁴ოი, შემცოდავო ერო, ხალხო დამძიმებულო ურჯულოებით, თესლო ბოროტმოქმედთა, დამღუპველო ძენო! დატოვეს უფალი, შეიძულეს ისრაელის წმიდა, უკან განდგნენ.

⁵რისთვის უნდა იცემოთ მეტად? უმატებთ განდგომას! თავი მთლიანად სნეულია და გული მთლიანად მტკივანი.

⁶ფეხის გულიდან თავამდე არაფერია მასში უვნებელი; ჭრილობა და ნაგვემი და ჩირქოვანი წყლული - არ გამოწურულან ისინი, და არ შეხვეულა და არ დაამებულა მალამოთი.

⁷აოხრებულია თქვენი ქვეყანა, ცეცხლითაა გადამწვარი თქვენი ქალაქები, თქვენი მიწა - თქვენი თანდასწრებით უცხონი ჭამენ მის ნაყოფს და აოხრებულია, როგორც უცხოთა მიერ დამხობისას.

⁸და დარჩა სიონის ასული, როგორც კარავი ვენახში, როგორც ქოხი ბოსტანში, როგორც ალყაშემორტყმული ქალაქი.

⁹უფალ ცაბაოთს რომ მცირე ნატამალი არ დაეტოვებინა ჩვენთვის, სოდომივით ვიქნებოდით, გომორას დავემსგავსებოდით.”

¹⁰ისმინეთ უფლის სიტყვა, სოდომის მთავარნო, ყური დაუგდეთ რჯულს ჩვენი ღმერთისას, გომორას ხალხო.

¹¹“რად მინდა მე თქვენი მრავალი შესაწირავი?” - ამბობს უფალი. - “გავძეხი მე სრულადდასაწველი ვერძებით და ქონით მსუქანი საქონლისა; და სისხლი მოზვერთა, ცხვრებისა და ვაცებისა არ მსურს მე.

¹²როდესაც მოდიხართ ჩემს წინაშე წარსადგომად, ვინ გთხოვთ ჩემი ეზოების გათელვას?

¹³არ მომიტანოთ მეტად ამაო ძღვენი; თქვენი საკმეველი - სისაძაგლეა ის ჩემთვის, ახალმთვარობას და შაბათს, სადღესასწაულო შეკრებას ვერ ვიტან: ურჯულოება და დღესასწაული?

¹⁴თქვენი ახალმთვარობები და დღესასწაულები შეიძულა ჩემმა სულმა, ტვირთად მექცა ისინი, დავიღალე მათი ზიდვით.

¹⁵და როცა თქვენ გაიწვდენთ ხელებს, მე აგარიდებთ თვალს, და რამდენიც არ უნდა ილოცოთ, არ მოგისმენთ. თქვენი ხელები სავსეა სისხლით.

¹⁶განიბანეთ, განიწმიდეთ, მოაშორეთ თქვენი ბოროტი ნამოქმედარი ჩემს თვალთაგან, შეწყვიტეთ ბოროტება.

¹⁷ისწავლეთ სიკეთის ქმნა, ეძებეთ სამართალი; გაამაგრეთ ჩაგრული, სამართლიანად გაასამართლეთ ობოლი, გამოესარჩლეთ ქვრივს.

¹⁸“მოდით და ვიკამათოთ,” - ამბობს უფალი. - “ყირმიზივით რომ იყოს თქვენი ცოდვები, თოვლივით გასპეტაკდება, და ჭიაფერივით წითელიც რომ იყოს, მატყლივით გადაიქცევა.

¹⁹თუ მოინდომებთ და შეისმენთ, მიწის დოვლათს შეჭამთ,

²⁰მაგრამ თუ უარს იტყვით და ურჩობას გასწევთ, მახვილით მოისპობით!” - რადგან უფლის პირმა წარმოთქვა ეს.

²¹როგორ იქცა მეძავად ერთგული ქალაქი? სავსე იყო სამართლიანობით, სიმართლე განისვენებდა იქ, ახლა კი მკვლელები არიან!

²²შენი ვერცხლი წიდად იქცა, შენი ღვინო წყალგარეულია.

²³შენი მთავარნი განდგომილნი და ქურდთა მეგობარნი არიან; მათ ყველას ქრთამი უყვართ და საზღაურს ედევნებიან, ობოლს არ ასამართლებენ სამართლიანად და ქვრივის საქმე არ აღწევს მათთან.

²⁴ამიტომაც არის სიტყვა უფალი ცაბაოთისა, ისრაელის ძლიერისა: “მე მოვისვენებ ჩემი დუშმანებისაგან და შურს ვიძიებ ჩემს მტრებზე.

²⁵და მოვაბრუნებ ჩემს ხელს შენსკენ და როგორც ნაცარტუტით, გავწმენდ შენს წიდას და მოვაცილებ მთელ შენს კალას.

²⁶და დავაბრუნებ შენს მსაჯულებს, როგორც თავდაპირველად იყო და შენს მრჩეველთ, როგორც დასაწყისში იყო! ამის შემდეგ გეწოდება შენ სამართლიანობის ქალაქი, სარწმუნო დედაქალაქი.”

²⁷სიონი სამართლიანობით იქნება გამოსყიდული, ხოლო მისი მოქცეულნი - სიმართლით.

²⁸და შემუსრვა ბოროტმოქმედთა და შემცოდავთა ერთად მოხდება, და უფლის მიმტოვებელნი მოისპობიან.

²⁹რადგან შერცხვებიან მუხნარების გამო, რომლებსაც თქვენ ნატრობდით, და შეგრცხვებათ ბაღებისა, რომლებიც თქვენ ამოირჩიეთ.

³⁰რადგან იქნებით ფოთოლშემჭკნარ მუხასავით და ბაღივით, რომელშიც არაა წყალი.

³¹და ძლიერი ძენძად იქცევა, და მისი ნაკეთობა - ნაპერწკლად, და ორივე ერთად დაიწვება, და არავინ იქნება ჩამქრობი.