Read სბს–სტოკჰოლმი 2001 ესაია 11 Bible Online

ესაია 11 - სბს–სტოკჰოლმი 2001 bible

ესაია 11

¹და გამოვა ყლორტი იესეს კუნძიდან და ნორჩი ნერგი მისი ფესვებიდან ნაყოფს გამოიღებს.

²და დაივანებს მასზე უფლის სული, სული სიბრძნისა და გონიერებისა, სული რჩევისა და ძლიერებისა, სული ცოდნისა და უფლის მოშიშებისა.

³უფლის მოშიშებაშია მისი განცხრომა და თავისი თვალთახედვით არ გაასამართლებს, და თავისი ყურთასმენით არ ამხილებს.

⁴და სიმართლით გაასამართლებს ღატაკთ და სისწორით განიკითხავს ქვეყნის ჩაგრულთ, და კვერთხით თავისი ბაგისა დასცემს ქვეყანას და თავის ბაგეთა სუნთქვით მოკლავს უკეთურს.

⁵და იქნება სიმართლე სარტყელი მისი წელისა და ჭეშმარიტება - სარტყელი მისი თეძოებისა.

⁶და მგელი კრავთან ერთად იცხოვრებს, და ვეფხვი თიკნის გვერდით წამოწვება, ხბო, ლომის ბოკვერი და ხარი ერთად იქნებიან და პატარა ბიჭი წაუძღვება მათ.

⁷ძროხა და დათვი ერთად დაიმწყემსება, და მათი შვილები ერთად წამოწვებიან, და ლომი ხარივით შეჭამს ჩალას.

⁸ძუძუთა ბავშვი ასპიტის ხვრელზე ითამაშებს და ძუძუს მოწყვეტილი ხელს გაიშვერს გველგესლას ბუნაგზე.

⁹არ იბოროტებენ და არ დაღუპავენ მთელს ჩემს წმიდა მთაზე, რადგან ქვეყანა სავსე იქნება უფლის ცოდნით, როგორც ზღვაა დაფარული წყლებით.

¹⁰და იქნება იმ დღეს: ფესვი იესესი, რომელიც ნიშნად დგას ხალხებისათვის და მისკენ გაემართებიან ერები, და დიდება იქნება მისი განსასვენებელი.

¹¹და იქნება იმ დღეს: უფალი ისევ, მეორედ გაიწვდენს თავის ხელს, რათა გამოისყიდოს ნარჩენი თავისი ხალხისა, რომელიც დარჩება, აშურიდან და ეგვიპტიდან, ფათროსიდან და ქუშDიდან, ყელამიიდან და შინყარიდან, ხამათიდან და ზღვის კუნძულებიდან.

¹²და დროშას აღუმართავს ერებს, და შეკრებს გაძევებულთ ისრაელიდან და გაფანტულთ - იუდადან, შეაგროვებს ქვეყნის ოთხივე კიდიდან.

¹³და გაქრება შური ეფრემისა, და იუდას შემჭირვებლები ამოწყდებიან. ეფრემს აღარ შეშურდება იუდასი, და იუდა აღარ შეაჭირვებს ეფრემს.

¹⁴და დააფრინდებიან ფილისტიმელთა კალთებს დასავლეთიდან, ერთად გაძარცვავენ აღმოსავლეთის ძეთ, ედომი და მოაბი იქნებიან მათი ხელგადასაწვდომი, და ყამონის ძენი დაემორჩილებიან მათ.

¹⁵ამოაშრობს უფალი ყურეს ეგვიპტის ზღვისა; და ხელს მოიქნევს მდინარეზე თავის ძლიერ ქარში, და განწვალავს მას შვიდ ნაკადად, და ფეხსამოსით გაატარებს ხალხს.

¹⁶და ექნება გზა მისი ხალხის ნარჩენს, აშურს რომ გადაურჩა, როგორც ჰქონდა ისრაელს ეგვიპტიდან მისი გამოსვლის დღეს.