Read სბს–სტოკჰოლმი 2001 ესაია 16 Bible Online

ესაია 16 - სბს–სტოკჰოლმი 2001 bible

ესაია 16

¹ბატკანი გაუგზავნეთ ქვეყნის მბრძანებელს სელადან უდაბნოს გზით სიონის ასულის მთისაკენ.

²და იქნება როგორც მოხეტიალე ფრინველი, მოშლილ ბუდესავით იქნებიან მოაბის ასულნი არნონის ფონებზე.

³მომეცი რჩევა, აღასრულე სამართალი, შუადღისას გადააფარე შენი ჩრდილი, როგორც ღამით; შეიფარე გაძევებული, გაქცეულს ნუ გასცემ.

⁴იცხოვრონ შენთან ჩემმა მოაბელმა გაძევებულებმა, იყავი მათთვის მძარცველისგან თავშესაფარი, სანამ არ გაქრება მწვალებელი, სანამ არ შეწყდება ძარცვა, არ მოისპობა ქვეყნიდან მთრგუნავი.

⁵და განმტკიცდება ტახტი წყალობისა, და ჭეშმარიტებით დაჯდება მასზე დავითის კარავში მსაჯული, და სამართლის გამკითხავი და სიმართლის მოსწრაფე.

⁶ვისმინეთ ჩვენ მოაბის მზვაობრობა, მეტისმეტი ზვიადობა, მისი ამპარტავნება, მისი მზვაობრობა და მისი მძვინვარება. ამაოა მისი ტრაბახი.

⁷ამიტომ იქვითინებს მოაბი მოაბზე, - ყველა იქვითინებს; კირ-ხარეშეთის საძირკველზე იკვნესებთ სასოწარკვეთილნი.

⁸რადგან ხეშბონის მინდვრები გადაჭკნა, ასევე სიბმას ვენახები, ხალხთა პატრონებმა გათელეს მისი რჩეული ვაზები, იაყეზერს რომ სწვდებოდა, უდაბნოში იშლებოდა, იფურჩქნებოდა და ზღვაზე გადადიოდა.

⁹ამის გამო იაყეზერის ტირილით ვიტირებ მე სიბმას ვაზს; ჩემი ცრემლებით მოვრწყავ ხეშბონს და ელყალეს; რადგან შენს ზაფხულის ნაყოფსა და შენს მოსავალზე შეწყდა შემოძახილი.

¹⁰შეწყდა მხიარულება და სიხარული ნაყოფიერი მინდვრიდან, და ვენახებში აღარ იქნება სიმღერა და მხიარული შემოძახილი, საწნახლებში ღვინოს აღარ დაწურავს დამწურველი, რადგან მე შევაწყვეტინე მხიარული ხმები.

¹¹ამის გამო ქნარივით კვნესის ჩემი გული მოაბზე და ჩემი შიგანი - კირ-ხერეშზე.

¹²და იქნება, როდესაც გამოჩნდება, რომ დაიქანცა მოაბი გორაკზე, წავა ის თავის საკურთხეველთან სალოცავად და ვერ შეძლებს.

¹³ესაა სიტყვა, რომელიც უფალმა წარმოსთქვა მოაბზე ძველთაგან.

¹⁴ახლა კი ასე თქვა უფალმა: “სამი წლის შემდეგ, ქირავნობის წლების მიხედვით, შერცხვენილი იქნება მოაბის პატივი მიუხედავად დიდი სიმრავლისა; ნარჩენი კი ძალზე მცირე, უმნიშვნელო იქნება.”