Read სბს–სტოკჰოლმი 2001 ესაია 17 Bible Online

ესაია 17 - სბს–სტოკჰოლმი 2001 bible

ესაია 17

¹წარმონათქვამი დამასკოზე: “ნახეთ, დამასკო აღარ იქნება ქალაქი, არამედ მხოლოდ ნანგრევთა გროვა.

²ყაროყერის მიტოვებული ქალაქები ცხვრის ფარებისათვის იქნება, დაწვებიან და არავინ იქნება დამაფრთხობელი.

³და მოისპობა ციხე-სიმაგრე ეფრემისა, და მეფობა დამასკოსი და არამის ნარჩომი ისრაელის ძეთა დიდებასავით იქნება!” სიტყვა უფალ ცაბაოთისა.

⁴და იქნება იმ დღეს, დაკნინდება იაკობის დიდება, და სიმსუყე მისი ხორცისა დამჭლევდება.

⁵და იქნება, როგორც მომკელის მიერ სამკალის აღებისას, როდესაც მისი მკლავი თავთავს მოიმკის; და იქნება, როგორც თავთავის აკრეფისას რეფაიმის ხეობაში.

⁶და დარჩება მასში მცირე ნაყოფი, როგორც ზეთისხილის ხის დაბერტყვისას: ორი, სამი მარცვალი ტოტის კენწეროზე, ოთხი, ხუთი ნაყოფი ხის რტოებზე. სიტყვა უფლისა, ისრაელის ღმერთისა.

⁷იმ დღეს მიმართავს ადამიანი თავის გამჩენს, და მისი თვალები ისრაელის წმიდას იხილავენ.

⁸და არ მიმართავს თავისი ხელით ნაკეთებ სამსხვერპლოებს, და არ შეხედავს იმას, რაც მისმა თითებმა გააკეთეს - სერტყეებს და მზის კერპებს.

⁹და იმ დღეს იქნება მისი გამაგრებული ქალაქები, როგორც მიტოვებული ტყე და მთის მწვერვალები, რომლებიც დატოვეს ისრაელის ძეთა წინაშე, და იქნება უკაცრიელი.

¹⁰რადგან დაივიწყე შენ შენი ხსნის ღმერთი და შენი სიმაგრის კლდე აღარ გახსოვდა. ამიტომ დარგე შენ საამური ნერგები და უცხო ვაზი გააშენე.

¹¹დარგვის დღიდან ზრდიდი მას და დათესვის დილიდან აყვავებდი, მაგრამ მოსავალი დაიღუპება სნეულებისა და უკურნებელი სატკივარის დღეს.

¹²ოი, ხმაური მრავალი ხალხისა! როგორც ზღვა ხმაურობს, ისე ხმაურობენ ისინი, და ტომები ღრიალებენ, როგორც ღრიალებენ ძლიერი წყლები.

¹³ტომები ღრიალებენ, როგორც ბევრი წყლები ღრიალებენ, მაგრამ დატუქსავს იგი მათ და გაიქცევიან ისინი შორს, და გაიხვეტებიან, როგორც ქარისგან ჩენჩო მთებზე, და როგორც მტვრის გორგალი ქარიშხალისგან.

¹⁴საღამოს ჟამს - აჰა, საშინელება! განთიადამდე აღარა იქნება. ესაა წილი ჩვენს გამძარცველთა და ხვედრი ჩვენს მაოხრებელთა.