Read სბს–სტოკჰოლმი 2001 ესაია 19 Bible Online

ესაია 19 - სბს–სტოკჰოლმი 2001 bible

ესაია 19

¹წარმონათქვამი ეგვიპტეზე: ნახეთ, უფალი ზის სწრაფ ღრუბელზე და მიდის ეგვიპტეში, და შეიძრებიან ეგვიპტის კერპნი მის წინაშე, და ეგვიპტელთა გულები დადნება მის წიაღში.

²“მე წავაქეზებ ეგვიპტელებს ეგვიპტელთა წინააღმდეგ; და შეებრძოლებიან ისინი - ძმა ძმას და მოყვასი მოყვასს, ქალაქი ქალაქს, სამეფო სამეფოს.

³და ეგვიპტის სული დაილევა მის წიაღში; და ჩავშლი მის განზრახვას. გამოჰკითხავენ ისინი კერპებს, წამჩურჩულებელთ, მესულთანეთ და მკითხავთ;

⁴და გადავცემ ეგვიპტელებს სასტიკ ბატონთა ხელთ, და მძლავრი მეფე იმბრძანებლებს,” სიტყვა უფალ ცაბაოთისა.

⁵და ამოშრება წყალი ზღვაში, მდინარე გავერანდება და დაშრება.

⁶და ამყრალდებიან მდინარეები, დაიწრიტება და დაშრება ეგვიპტის არხები, ლერწამი და ლაქაში დაჭკნება.

⁷გაშიშვლდება მინდვრები მდინარესთან, მდინარის მთელი ნაპირი და მთელი ნათესი გახმება, გაიხვეტება და აღარ იქნება.

⁸ატირდებიან მეთევზენი და იგლოვებს მდინარეში ანკესის ყველა გადამგდები, და წყალზე ბადის გამფენელს ქანცი გაუწყდება.

⁹შერცხვებიან სელის მჩეჩავნი და თეთრი ტილოს მქსოველნი.

¹⁰დაილეწება მისი სვეტები, და ყველა მოქირავნეს სული შეუღონდება.

¹¹მაგრამ სულელნი არიან ცოყანის მთავარნი: ფარაონის ბრძენ მრჩეველთა რჩევა გაცუდდა! როგორ ეტყვით თქვენ ფარაონს: “ბრძენთა ძე ვარ, მე ვარ ძე უწინდელ მეფეთა?”

¹²თუ ასეა, სად არიან შენი ბრძენნი? გითხრან და შეიტყონ, რა გადაუწყვიტა უფალმა ცაბაოთმა ეგვიპტეს!

¹³სულელურად მოიქცნენ ცოყანის მთავარნი, მოტყუვდნენ ნოფის მთავარნი; გზაკვალი აურიეს ეგვიპტეს მისი ტომების წინამძღოლებმა.

¹⁴უფალმა ჩაუღვარა წიაღში უკუღმართი სული და მათ გზაკვალი აურიეს ეგვიპტეს მის ყველა საქმეში, მთვრალივით ბარბაცებს თავის ნარწყევში.

¹⁵და არ იქნება ეგვიპტეში საქმე, რასაც გააკეთებს თავი და კუდი, პალმის ფოთოლი და ლელქაში.

¹⁶იმ დღეს ეგვიპტელები ქალებს დაემსგავსებია და დაფრთხებიან და შეეშინდებათ უფალ ცაბაოთის ხელის მოქნევისა, როცა ხელს მოიქნევს მათზე.

¹⁷და იქნება იუდას მიწა შიშისზარი ეგვიპტისათვის; ყოველი, ვინც მას გაიხსენებს, აკანკალდება უფალ ცაბაოთის განაჩენის გამო, რაც მან განაჩინა მასზე.

¹⁸იმ დღეს ეგვიპტის ქვეყანაში ხუთი ქალაქი ილაპარაკებს ქანაანის ენაზე და დაიფიცებს უფალ ცაბაოთს. ირჰერესს უწოდებენ ერთ ქალაქს.

¹⁹იმ დღეს უფლის სამსხვერპლო ეგვიპტის ქვეყნის შუაგულში იქნება და უფლის სვეტი - მის საზღვართან.

²⁰და იქნება ეს ნიშნად და მოწმობად უფალ ცაბაოთისა ეგვიპტის ქვეყანაში: როდესაც შეჰღაღადებენ ისინი უფალს შემჭირვებელთა გამო, ის გამოუგზავნის მათ მხსნელს და ქომაგს და უშველის მათ.

²¹და ცნობილი გახდება უფალი ეგვიპტეში და ეგვიპტელნი შეიცნობენ უფალს იმ დღეს, და მოიტანენ შესაწირავსა და ძღვენს, და აღთქმას აღუთქვამენ უფალს და აღასრულებენ.

²²და წყლულით დააწყლულებს უფალი ეგვიპტეს და განკურნავს და მოიქცევიან ისინი უფლისაკენ, შეისმენს მათ ვედრებას და განკურნავს მათ.

²³იმ დღეს გზა იქნება ეგვიპტიდან აშურში და მოვლენ აშურელნი ეგვიპტეში და ეგვიპტელნი აშურში, და ეგვიპტელნი აშურთან ერთად თაყვანს სცემენ უფალს.

²⁴იმ დღეს ისრაელი მესამე მოკავშირე იქნება ეგვიპტისა და აშურისა. კურთხევად იქნებიან ისინი ქვეყნის შუაგულში.

²⁵რადგან აკურთხა ის უფალმა ცაბაოთმა ასე: “კურთხეულ იყოს ჩემი ხალხი - ეგვიპტელნი, ჩემი ხელის ნაკეთები - აშური და ჩემი წილხვედრილი - ისრაელი.”