Read სბს–სტოკჰოლმი 2001 ესაია 2 Bible Online

ესაია 2 - სბს–სტოკჰოლმი 2001 bible

ესაია 2

¹სიტყვა, რომელიც იხილა ესაიამ, ამოცის ძემ, იუდასა და იერუსალიმის შესახებ.

²და იქნება, უკანასკნელ დღეებში განმტკიცდება მთა უფლის სახლისა, მთების სათავეში დადგინდება, და ამაღლდება ბორცვებზე, და დინებას დაიწყებს მისკენ ყველა ერი.

³და წავლენ მრავალი ხალხები და იტყვიან: “მოდით და ავიდეთ უფლის მთაზე იაკობის ღმერთის სახლში, და ის გვასწავლის ჩვენ თავის გზებს, და ვივლით მისი ბილიკებით.” რადგან სიონიდან გამოვა რჯული, და უფლის სიტყვა - იერუსალიმიდან.

⁴და გაასამართლებს ის ერებს, და ამხილებს ის მრავალ ხალხებს; და გამოჭედავენ ისინი თავიანთ მახვილებს სახნისებად და თავიანთ შუბებს - ნამგლებად; აღარ აღმართავს ერი ერზე მახვილს, და აღარ ისწავლიან მეტად ბრძოლას.

⁵სახლო იაკობისა, მოდით და ვიაროთ უფლის ნათელში!

⁶მაგრამ შენ მიატოვე შენი ხალხი, სახლი იაკობისა, რადგან გაივსნენ აღმოსავლეთიდან და მისნობენ ფილისტიმელთა და უცხოტომელთა მსგავსად; და უცხოტომელთა შვილებით კმაყოფილდებიან.

⁷და გაივსო მისი ქვეყანა ვერცხლითა და ოქროთი, და ბოლო არ უჩანს მათ საგანძურს; აივსო მათი ქვეყანა ცხენებით, და ბოლო არა აქვს მის ეტლებს.

⁸და გაივსო მისი ქვეყანა კერპებით, თავიანთი ხელის ნაკეთებს სცემენ თაყვანს, იმას, რაც მათმა თითებმა გააკეთეს.

⁹და დამდაბლდა ადამიანი და დამცირდა კაცი; და შენ ნუ შეუნდობ მათ.

¹⁰შეასწარ კლდეში და დაიმალე მიწაში უფლის შიშისაგან და მისი დიდებულების ბრწყინვალებისაგან.

¹¹ადამიანის თვალთა ქედმაღლობა დამცირდება, და კაცთა ამპარტავნება დამდაბლდება, და მარტო უფალი განდიდდება იმ დღეს.

¹²რადგან უფალი ცაბაოთის დღე იქნება ყოველ ქედმაღალსა და ამპარტავანზე და ყოველ ამაღლებულზე. და დამცირდება ის;

¹³და ლიბანის ყველა მაღალ და აშოლტილ კედარზე, ბაშანის ყველა მუხაზე;

¹⁴და ყველა მაღალ მთაზე და ყველა ამაღლებულ ბორცვზე,

¹⁵და ყველა მაღალ კოშკზე და ყველა გამაგრებულ გალავანზე;

¹⁶და თარშიშის ყველა ხომალდზე და ყველა სასურველ ნივთზე.

¹⁷დამდაბლდება ადამიანის ქედმაღლობა, და დამცირდება კაცთა ამპარტავნება, და მარტო უფალი განდიდდება იმ დღეს.

¹⁸და კერპები მთლიანად გაქრებიან.

¹⁹და ადამიანები ჩაძვრებიან კლდეთა გამოქვაბულებში და მიწის ხვრელებში უფლის შიშისაგან და მისი დიდებულების ბრწყინვალებისაგან, როდესაც ის აღდგება ქვეყნის მოსასპობად.

²⁰იმ დღეს გადაყრის ადამიანი თავის ვერცხლის კერპებს და თავის ოქროს კერპებს, რომლებიც გაიკეთა მან თხუნელებისა და ღამურების თაყვანის საცემად.

²¹და ჩაიმალებიან მთის ბზარებში და კლდეთა ნაპრალებში უფლის შიშისაგან და მისი დიდებულების ბრწყინვალებისაგან, როცა ის აღდგება ქვეყნის მოსასპობად.

²²ნუ მიენდობით ადამიანს, რომლის სუნთქვაც მის ნესტოებშია, რადგან რამდენად შეფასდება იგი?