Read სბს–სტოკჰოლმი 2001 ესაია 22 Bible Online

ესაია 22 - სბს–სტოკჰოლმი 2001 bible

ესაია 22

¹წარმონათქვამი ხილვათა ხეობაზე. რა მოგივიდა შენ, რომ მთლიანად ახვედი ერდოებზე?

²მღელვარებით სავსე, ხმაურიანო ქალაქო, შენი დახოცილნი მახვილით არ დახოცილან და არც ბრძოლაში დაღუპულან.

³ყველა შენი წინამძღოლი ერთად გაიქცა, უმშვილდოდ იქნენ შეპყრობილნი; ყველა, ვინც შენგან დარჩა, ერთად არიან შეპყრობილნი, თუმცა შორს გარბოდნენ ისინი.

⁴ამიტომ ვთქვი მე: “პირი შემაქციეთ, მწარედ უნდა ვიტირო მე. ნუ ეცდებით ჩემს ნუგეშისცემას, ჩემი ერის ასულის უბედურების გამო.”

⁵რადგან უფალ ცაბაოთისაგან აურზაურისა და მარცხის და დაბნეულობის დღეა, ხილვათა ხეობაში. კედლებს ანგრევენ და მთისაკენ გაჰყვირიან.

⁶და ყელამს მიაქვს კაპარჭი მეეტლეებითა და მხედრებით, ხოლო კირი ფარს აშიშვლებს.

⁷შენი ნარჩევი ხეობები ეტლებით ივსება და მხედარნი კარიბჭის პირდაპირ დაეწყვნენ.

⁸ახდილია იუდას საფარველი, და შენ შეხედე იმ დღეს მაღნარის სასახლის საჭურველს.

⁹და იხილეთ თქვენ, რომ გამრავლდა ბზარები დავითის ქალაქში. და აგროვებდით წყალს ქვემო აუზისა,

¹⁰და ითვლიდით იერუსალიმის სახლებს და ანგრევდით იმ სახლებს გალავნის გასამაგრებლად,

¹¹და მოაწყვეთ საცავი ორ გალავანს შორის ძველი აუზისათვის. არ შეხედეთ მის გამკეთებელს, და ძველთაგან მისი დამსახველი არ დაინახეთ.

¹²მოუხმობს უფალი ცაბაოთი იმ დღეს სატირლად და საგლოვად, თმების დასაგლეჯად და ძაძების შესამოსად.

¹³მაგრამ აი, ლხინი და მხიარულება! კლავენ ძროხას და ყელს ჭრიან ცხვარს, ჭამენ ხორცსა და სვამენ ღვინოს: “ჭამეთ და სვით, რადგან ხვალ დაიხოცებით”.

¹⁴და ყურში გამიმხილა უფალმა ცაბაოთმა: “არ მიგეტევებათ თქვენ ეს ურჯულოება, მანამ არ დაიხოცებით”, თქვა უფალმა ცაბაოთმა.

¹⁵ასე თქვა უფალმა ცაბაოთმა: “წადი, მიდი ამ სამეფო კარის მოხელესთან, შებნასთან, რომელიც სახლზეა დადგენილი:

¹⁶რა გაქვს აქ და ვინა გყავს აქ, რომ ამოგიკვეთავს აქ შენთვის სამარხი? ის კვეთს თავის სამარხს მაღალზე და კლდეში ჭრის სავანეს თავისთვის.

¹⁷‘აი, უფალი მოგისვრის შენ ძლიერი მოსროლით და დაკეცვით დაგკეცავს შენ.

¹⁸დაგგორგლავს გორგლად, ბურთივით მოგისვრის ვრცელ მიწაზე; იქ მოკვდები და იქ დარჩება შენი დიდების ეტლები, სირცხვილო შენი ბატონის სახლისა!’

¹⁹გადაგაყენებ შენი ადგილიდან და შენი მდგომარეობიდან დაგამხობ.

²⁰და იქნება იმ დღეს: მოვიხმობ ჩემს მსახურს ელიაკიმს, ხილკიაჰუს ძეს,

²¹და ჩავაცმევ შენს კვართს და შენს ქამარს შემოვარტყამ წელზე, და შენს ხელმწიფებას გადავცემ მის ხელთ და იქნება ის იერუსალიმის მცხოვრებთა და იუდას სახლის მამად.

²²დავადებ მხარზე დავითის სახლის გასაღებს, დაკეტავს და არავინ იქნება გამღები, გააღებს და არავინ იქნება დამკეტი.

²³პალოსავით ჩავარჭობ მას მყარ ადგილზე, და იქნება ის დიდების ტახტად თავისი მამის სახლისათვის.

²⁴და ჩამოჰკიდებენ მას მამამისის სახლის მთელ დიდებას - შთამომავალსა და ნაშიერს, ყველა მცირე ჭურჭელს - ტაშტეულობიდან ყოველ დოქამდე.

²⁵“იმ დღეს, - ამბობს უფალი ცაბაოთი, - მოირყევა მყარ ადგილში ჩარჭობილი პალო, გადატყდება და დაეცემა, და მოწყდება ტვირთი, რომელიც მასზეა, რადგან უფალმა თქვა.”