Read სბს–სტოკჰოლმი 2001 ესაია 27 Bible Online

ესაია 27 - სბს–სტოკჰოლმი 2001 bible

ესაია 27

¹იმ დღეს დასჯის უფალი თავისი სასტიკი, დიდი და მაგარი მახვილით, ლევიათანს, მორბენალ გველს, და ლევიათანს, დაკლაკნილ გველს, და მოკლავს ურჩხულს, რომელიც ზღვაშია.

²იმ დღეს: “უმღერეთ მას - ვაზს ღვინისას,

³მე, უფალი, მისი მცველი ვარ, ყოველ წამს ვრწყავ მას, რათა არ დააზიანონ, ღამით და დღისით ვიცავ მას.

⁴მრისხანება არა მაქვს მე, ვინ მომცემს ბრძოლაში ნარ-ეკალს, გადავთელავდი მათ, გადავბუგავდი ერთიანად.

⁵თუ ჩაეჭიდება ჩემს სიმტკიცეს, რათა ქმნას ჩემთან მშვიდობა, ქმნას მშვიდობა ჩემთან.”

⁶მომავალ დღეებში ფესვს გაიდგამს იაკობი, გაიფურჩქნება და გაიკვირტება ისრაელი, და გაივსება ქვეყნიერების პირი ნაყოფით.

⁷განა ასე სცემდა იგი მას, როგორც მის მცემელს სცემდა? განა ისეა მოკლული, როგორც მის მიერ არიან მოკლული.

⁸განდევნით, გაძევებით სჯი მას. გააგდო იგი თავისი ძლიერი ქროლვით, როგორც აღმოსავლეთის ქარის დღეს.

⁹ამიტომ ამით მიტევებულ იქნება იაკობის ურჯულოება, და ეს იქნება სრული ნაყოფი მისი ცოდვის მოცილებისა: როცა სამსხვერპლოს ყველა ქვას გაცამტვერებულ კირქვასავით გახდის, როცა აღარ იქნებიან მეტად აშერები და მზის კერპები.

¹⁰რადგან გამაგრებული ქალაქი გაუკაცრიელდება, საცხოვრებელი დატოვებული და მიგდებული იქნება უდაბნოსავით. ხბო მოძოვს იქ და წამოწვება, და შეჭამს მის ტოტებს.

¹¹როდესაც გახმება მისი ამონაყარი, დაილეწება, ქალები მოვლენ და დაწვავენ მას; რადგან გონიერი ხალხი არ არიან ისინი. ამის გამო მათი გამჩენი არ შეიბრალებს მათ და მათი შემქმნელი მათ არ შეიწყალებს.

¹²და მოხდება იმ დღეს, რომ ჩამობერტყავს უფალი თავის ნაყოფს მდინარის შესართავიდან ეგვიპტის ხევამდე და თქვენ აკრეფილნი იქნებით სათითაოდ, ისრაელის ძენო.

¹³და მოხდება იმ დღეს, რომ ჩაბერავენ დიდ საყვირს და მოვლენ აშურის ქვეყანაში დაკარგულნი და ეგვიპტის ქვეყანაში გაძევებულნი, და თაყვანს სცემენ უფალს წმიდა მთაზე, იერუსალიმში.