Read სბს–სტოკჰოლმი 2001 ესაია 35 Bible Online

ესაია 35 - სბს–სტოკჰოლმი 2001 bible

ესაია 35

¹გაიხარებს უდაბნო და ურწყული მიწა, და გამხიარულდება ტრამალი და გაიფურჩქნება, როგორც მთის შროშანი.

²აყვავდება და გაიფურჩქნება და იმხიარულებს ლხენითა და სიმღერით; ლიბანის დიდება მიეცემა მას, ქარმელისა და შარონის ბრწყინვალება. ისინი იხილავენ უფლის დიდებას, ჩვენი ღმერთის დიდებულებას.

³განიმტკიცეთ მოშვებული ხელები და დასუსტებული მუხლები გაიმაგრეთ.

⁴უთხარით სულმოკლეთ: “განმტკიცდით, ნუ შეშინდებით, აჰა თქვენი ღმერთი, შურისგება მოვა - ღვთის საზღაური, ის მოვა და გიხსნით.”

⁵მაშინ აეხილებათ თვალები ბრმებს და ყრუთა ყურები გაიხსნება.

⁶მაშინ ირემივით იხტუნებს ხეიბარი და მუნჯის ენა ამღერდება, რადგან უდაბნოში წყალი ამოხეთქავს და ტრამალზე - ნაკადულები.

⁷და იქცევა ხრიოკი ტბად და უწყლო ადგილი - წყლის წყაროდ; ტურების ბუნაგში, მათ ყუდროში, ბალახი ლერწამივით და ლელქაშივით იქნება.

⁸და შარაგზა იქნება იქ, და სიწმიდის გზა დაერქმევა მას; უწმიდური არ გაივლის მასზე, გზაზე მავალისთვის იქნება იგი, და ბრიყვები არ დაიბნევიან.

⁹არ იქნება იქ ლომი და მტაცებელი მხეცი არ აღდგება მასზე, არ გაიჭაჭანებს იქ, და ივლიან გადარჩენილნი.

¹⁰უფლის გამოსყიდულნი დაბრუნდებიან და მივლენ სიონში სიმღერით. და საუკუნო სიხარული იქნება მათ თავზე, და ლხინსა და სიხარულს ეწევიან, დარდი და ოხვრა უკუიქცევა.