Read სბს–სტოკჰოლმი 2001 ესაია 38 Bible Online

ესაია 38 - სბს–სტოკჰოლმი 2001 bible

ესაია 38

¹იმ დღეებში ავად გახდა ხიზკიაჰუ და მივიდა მასთან ესაია, ამოცის ძე, წინასწარმეტყველი, და უთხრა მას: “ასე თქვა უფალმა: ანდერძი დაწერე შენი სახლისათვის, რადგან მოკვდები, ვერ გადარჩები!”

²და მიატრიალა ხიზკიაჰუმ პირი კედლისაკენ და შეევედრა უფალს;

³ამბობდა: “გთხოვ, უფალო! გაიხსენე, რომ დავდიოდი შენს წინაშე ჭეშმარიტებით და მთელი გულით, და რაც კეთილია შენს თვალში, იმას ვაკეთებდი.” და მწარედ ატირდა ხიზკიაჰუ.

⁴იყო სიტყვა უფლისა ესაიასადმი:

⁵“წადი და უთხარი ხიზკიაჰუს: ასე თქვა უფალმა, დავითის, შენი მამის, ღმერთმა: ‘ვისმინე შენი ვედრება, დავინახე შენი ცრემლები. აჰა, მე ვუმატებ შენს დღეებს თხუთმეტ წელს.

⁶გიხსნით შენ და ამ ქალაქს აშურის მეფის ხელიდან.’

⁷ეს იყოს შენთვის ნიშნად უფლისაგან, რომ შეასრულებს უფალი იმ სიტყვას, რომელიც მან წარმოსთქვა:

⁸‘ავაბრუნებ საფეხურებზე ჩრდილს, რომელიც ახაზის საფეხურებზე ჩავიდა მზესთან ერთად, ათი საფეხურით უკან.’ და მართლაც დაბრუნდა მზე ათი საფეხურით, რომლითაც ის ჩავიდა.

⁹წერილი ხიზკიაჰუსი, იუდას მეფისა, როდესაც ავად იყო და განიკურნა თავისი ავადმყოფობისაგან.

¹⁰მე ვთქვი: “ჩემი დღეების შუაძალში გავივლი შავეთის კარიბჭეს, მომაკლდება დანარჩენი წლები.”

¹¹ვთქვი: “ვერ ვიხილავ უფალს, უფალს ცოცხალთა ქვეყანაში, ვეღარ დავინახავ ადამიანს ქვეყნიერების მცხოვრებთა შორის.

¹²ჩემი წუთისოფელი აყრილია და წაღებულია ჩემგან, როგორც მწყემსის კარავი. მქსოველივით ვახვევდი ჩემს ცხოვრებას; და დგიმის ძირშივე მომკვეთა მე. დღიდან ღამემდე ბოლოს მიღებდა.

¹³დილამდე ვიმხნევებდი თავს, მაგრამ ლომივით მილეწდა მთელ ძვლებს, დილიდან ღამემდე ბოლოს მიღებდა.

¹⁴ვჟიოდი მერცხალივით, წეროსავით ვყიოდი, როგორც მტრედი, ვკვნესოდი, ცისკენ იყო მიპყრობილი ჩემი თვალები. უფალო, გამიჭირდა, შემეშველე!

¹⁵რა შემიძლია ვთქვა? მან მითხრა და მანვე აღასრულა. ვიხეტიალებ მთელი წლები ჩემი სულის სიმწარეში.

¹⁶უფალო! ამით ცოცხლობენ, და ყოველივე ამაშია ჩემი სულის სიცოცხლე. შენ განმკურნავ და გამაცოცხლებ მე.

¹⁷აჰა, სიმრთელისთვის მქონდა მე დიდი სიმწარე, და შენ მოინებე ჩემი სული წარსაწყმედელიდან, რადგან შენს ზურგს უკან გადაყარე ყველა ჩემი ცოდვა.

¹⁸რადგან შავეთი არ გაქებს შენ, სიკვდილი არ შეგასხამს ხოტბას, საფლავად ჩამავალნი არ დაენდობიან შენს ჭეშმარიტებას.

¹⁹ცოცხალი! ცოცხალი - ის შეგაქებს შენ, როგორც მე გაქებ დღეს. მამა შვილებს აუწყებს შენს ჭეშმარიტებას.

²⁰უფალია ჩემს სახსნელად, და ჩემს სიმღერებს ვიმღერებთ მთელი ჩვენი სიცოცხლე უფლის სახლში.”

²¹და თქვა ესაიამ: “მოუტანონ ლეღვის კვერი და წააცხონ წყლულზე და გადარჩება.”

²²თქვა ხიზკიაჰუმ: “რა სასწაულია, რომ ავალ უფლის სახლში?”