Read სბს–სტოკჰოლმი 2001 ესაია 48 Bible Online

ესაია 48 - სბს–სტოკჰოლმი 2001 bible

ესაია 48

¹“ისმინეთ ეს, იაკობის სახლო, ისრაელის სახელით წოდებულნო და იუდას წყლებიდან გამოსულნო, დამფიცებელნო უფლის სახელით, და ისრაელის ღმერთის მხსენებელნო, მაგრამ არც ჭეშმარიტებითა და არც სიმართლით;

²რადგან წმიდა ქალაქიდან წარმოშობილს უწოდებენ ისინი თავიანთ თავს და ისრაელის ღმერთზე არიან დანდობილნი. უფალი ცაბაოთია მისი სახელი!

³პირვანდელნი დიდი ხნით ადრე გამოვაცხადე, და ჩემი პირიდან გამოვიდა და ვაუწყებდი მათ, და უცბად ვიქმოდი და სრულდებოდა.

⁴რადგან ვიცოდი, რომ ჯიუტი ხარ და რკინის ძარღვისაა შენი ქედი, შენი შუბლი კი - სპილენძისა.

⁵გამოგიცხადე დიდი ხნით ადრე, სანამ ეს მოხდებოდა, გაუწყე, რომ არ გეთქვა: ‘ჩემმა ქანდაკმა გააკეთა ეს და ჩემმა ჩამოსხმულმა კერპმა მიბრძანა ეს!’

⁶შენ გაგონილი გაქვს, იხილე ეს ყველაფერი. ნუთუ არ აღიარებ? მე გაუწყე შენ ახალნი და დაფარულნიც კი, რაც არ იცოდი.

⁷ახლა გაჩნდა ისინი და არა დიდი ხნის წინ; და დღემდე არ გსმენია შენ მათზე. რომ არ თქვა: ‘აჰა, ვიცოდი ეს!’

⁸არც გსმენია და არც იცოდი, და არც უწინდლიდან არ იყო გახსნილი შენი ყური, რადგან ვიცოდი, რომ მიღალატებდი, და დედის მუცლიდან განმდგარი გიწოდეს.

⁹ჩემი სახელის გულისათვის დავაცხრობ ჩემს რისხვას, და ჩემი დიდების გულისათვის ვიოკებ თავს, რომ არ მოგკვეთო შენ.

¹⁰აჰა, მე გამოგადნე, მაგრამ არა როგორც ვერცხლი, წამების ბრძმედში გამოგცადე.

¹¹ჩემი გულისათვის, ჩემი გულისათვის ვმოქმედებ, რადგან როგორ უნდა გარიოშდეს ჩემი სახელი? ჩემს დიდებას სხვას არ მივცემ.

¹²მისმინე მე, იაკობ და ისრაელ, ჩემს მიერ წოდებულო, მე იგივე ვარ, მე ვარ პირველი და მე ვარ უკანასკნელიც!

¹³ჩემმა ხელმა დააფუძნა დედამიწა, და ჩემმა მარჯვენამ გადაჭიმა ზეცა; მე მოვუხმობ მათ და ერთად დადგებიან.

¹⁴შეგროვდით ყველანი და ისმინეთ! მათგან ვინ გამოაცხადა ეს? უფალმა შეიყვარა იგი, შეასრულებს მის ნებას ბაბილონზე, და მისი მკლავი ქალდეველებზე აღიმართება.

¹⁵მე, მე ვთქვი და მოვუხმე მას, მე მოვიყვანე ის და წარმატებული იქნება მისი გზა.

¹⁶მომიახლოვდით მე, ისმინეთ ეს: თავიდან ფარულად არ მილაპარაკია, იმ დროიდან, როცა ეს მოხდა, იქ ვიყავი. ახლა კი უფალმა ღმერთმა და მისმა სულმა მომავლინა მე.”

¹⁷ასე ამბობს უფალი, შენი მხსნელი, ისრაელის წმიდა: “მე ვარ უფალი, შენი ღმერთი, რომელიც გასწავლის სარგებლობას, რომელიც მიგიძღვის იმ გზაზე, რომელზეც უნდა დადიოდე.

¹⁸ყურად რომ გეღო ჩემი მცნებები, მდინარესავით იქნებოდა შენი მშვიდობა, და შენი სიმართლე - ზღვის ტალღებივით.

¹⁹ქვიშასავით მრავალი იქნებოდა შენი თესლი, და შენი წიაღის ნაშიერნი - ქვიშის მარცვლებივით. არ მოიკვეთებოდა და არ წაიშლებოდა მისი სახელი ჩემს წინაშე.”

²⁰გამოდით ბაბილონიდან, გაიქეცით ქალდეველთაგან, მხიარული ხმით გამოაცხადეთ, აუწყეთ ეს, გაავრცელეთ ქვეყნის კიდემდე, თქვით: “გამოისყიდა უფალმა თავისი მსახური იაკობი!”

²¹მათ არ სწყუროდათ უდაბნოებში, როცა მიჰყავდა ისინი: კლდიდან წყალი უდინა მათ და გააპო კლდე და გადმოჩქეფა წყალმა.

²²“არ არის მშვიდობა, - ამბობს უფალი, - ბოროტეულთათვის!”.