Read სბს–სტოკჰოლმი 2001 ესაია 54 Bible Online

ესაია 54 - სბს–სტოკჰოლმი 2001 bible

ესაია 54

¹“იხარე, ბერწო, ვისაც არასდროს არ გიშობია, შემოსძახე სიმღერა და იმხიარულე, უტანჯველო მშობიარობით, რადგან მარტოხელას ძენი მეტნი იქნებიან, ვიდრე ქმრიანის ძენი,” - ამბობს უფალი. -

²“გააფართოვე ადგილი შენი კარვისა და ფარდები შენი საცხოვრებლისა დაჭიმე; ნუ დაინანებ, დააგრძელე შენი საბელები და შენი პალოები გაამაგრე,

³რადგან მარჯვნივ და მარცხნივ განივრცობი და შენი თესლი ხალხებს დაიპყრობს. და უკაცრიელ ქალაქებს დაასახლებს.

⁴ნუ გეშინია, რადგან არ შერცხვები და არ გაწბილდები, რადგან აღარ შეგრცხვება, რადგან სიყმაწვილის სირცხვილს დაივიწყებ და შენი ქვრივობის უპატიობას აღარ გაიხსენებ.

⁵რადგან შენი ქმარი შენი შემქმნელია, უფალი ცაბაოთია მისი სახელი. და შენი მხსნელი - ისრაელის წმიდა - მთელი ქვეყნის ღმერთად იწოდება.

⁶რადგან როგორც ქალი, მიტოვებული და სულმწუხარე, მოგიხმო შენ უფალმა, და როგორც სიყმაწვილის ცოლი, რომელიც მოძულებული იყო!” - ამბობს შენი ღმერთი. -

⁷“წამიერად დაგტოვე და დიდი მოწყალებით შეგკრებ შენ.

⁸რისხვის გზნებაში დაგიმალე წამიერად ჩემი სახე და საუკუნო წყალობით შეგიწყალებ!” - ამბობს შენი მხსნელი უფალი. -

⁹“რადგან ეს ჩემთვის ნოეს წყლებივით არის: როგორც დავიფიცე, რომ ნოეს წყლები აღარ გადაუვლიან მეტად დედამიწას, ისე დავიფიცე მე, არ განვრისხდე შენზე და არ გაგკიცხო.

¹⁰რადგან მთები დაიძვრებიან და ბორცვები შეირყევიან, ჩემი წყალობა კი არ დაიძვრება შენგან და ჩემი მშვიდობის აღთქმა არ შეირყევა,” - ამბობს შენი მწყალობელი უფალი.

¹¹“წამებულო, ღელვილო, უნუგეშებელო! აჰა, მე დავაწყობ შენს ქვებად ანთრაკს და შენი საფუძვლები საფირონი იქნება.

¹²გავაკეთებ ბადახშით შენს ქონგურებს და შენს ჭიშკრებს - ლალის ქვებით, და შენს ყველა ზღუდეს - ძვირფასი ქვებით.

¹³შენი ყველა ძე უფლის განსწავლული იქნება და დიდი იქნება შენს ძეთა მშვიდობა.

¹⁴სიმართლით დაფუძნდები, შორს იქნები ჩაგვრისაგან, რადგან არ შეგეშინდება და ძრწოლისაგან, რადგან არ მოგიახლოვდება.

¹⁵აჰა, თავს დაგესხმის, არა ჩემგან, ვინც შენ შეგებრძოლება, შენს წინ დაეცემა.

¹⁶მე გავაჩინე მჭედელი, რომელიც უბერავს ცეცხლში ნახშირს და გამოჰყავს იარაღი თავისი საქმისათვის; მე გავაჩინე დამანგრეველი დასაღუპავად.

¹⁷ყოველი იარაღი, დამზადებული შენს წინააღმდეგ, გაცუდდება; და ყოველ ენას, რომელიც შენს წინააღმდეგ წარდგება სამსჯავროზე, შენ დაადანაშაულებ. ეს არის ხვედრი უფლის მსახურთა და მათი გამართლება ჩემგან არის!” - ამბობს უფალი.