Read სბს–სტოკჰოლმი 2001 ესაია 56 Bible Online

ესაია 56 - სბს–სტოკჰოლმი 2001 bible

ესაია 56

¹ასე თქვა უფალმა: “დაიცავით სამართალი და ქმენით სიმართლე, რადგან ჩემი ხსნა მალე მოვა, და ჩემი სიმართლე გამოჩნდება.

²ნეტარია კაცი, ასე რომ იქცევა, და ადამიანი - ამას მოჭიდებული, შეუბღალავად რომ იცავს შაბათს და ბოროტის ქმნისგან იცავს თავის ხელს.”

³ნუ იტყვის უცხოტომელის ძე, უფალთან შემოერთებული: “უფალმა გამმიჯნა ერისაგან!” და ნუ იტყვის საჭურისი: “მე ხომ გამხმარი ხე ვარ!”

⁴რადგან ასე თქვა უფალმა: “საჭურისები, რომლებიც ჩემს შაბათებს იცავენ, ჩემთვის საწადელს ირჩევენ და ჩემს აღთქმას ინახავენ,

⁵მე მივცემ მათ ჩემს სახლში და ჩემს გალავნებში ძეგლსა და სახელს ჩემს ვაჟებზე და ასულებზე უკეთესს, საუკუნო სახელს მივცემ მათ, რომელიც არ წაიშლება.

⁶და ასევე უცხოტომელთ, შემოერთებულთ უფალთან, რომ ემსახურებიან მას და უყვართ უფლის სახელი, რათა იყვნენ მისი მსახურნი; ყველას, შეუბღალავად რომ იცავს შაბათს, და ჩემს აღთქმას მოჭიდებულთ.

⁷მე მოვიყვან მათ ჩემს წმიდა მთაზე და გავახარებ მათ ჩემს სამლოცველო სახლში; მათი სრულადდასაწველი და შესაწირავები სასურველი იქნება ჩემს სამსხვერპლოზე, რადგან ჩემი სახლი სამლოცველო სახლად იწოდება ხალხებისათვის.”

⁸ამბობს უფალი ღმერთი ისრაელის გაძევებულთა შემკრები: “კიდევ სხვებს შევკრებ მე მასთან, მის შეკრებილებთან.

⁹მოდით, მინდვრის ყველა ცხოველო, ტყის ყველა მხეცო, მოდით საჭმელად.

¹⁰მისი გუშაგნი ყველანი ბრმანი არიან, უცოდინარნი არიან ყველანი, მუნჯი ძაღლებია ყველანი, არ შეუძლიათ ყეფა, მძინარები არიან, წვანან, უყვართ თვლემა.

¹¹ეს ხარბი ძაღლებია, გაუმაძღარნი. მწყემსები არიან ისინი, მაგრამ გაგება არა აქვთ. ყველა თავის გზით გაემართა, თითოეული - თავის ანგარებისაკენ.

¹²და ამბობენ: “მოდით, ავიღოთ ღვინო და დავთვრეთ სასმელით, და ხვალე დღესავით იქნება, ან უკეთესი!”