Read სბს–სტოკჰოლმი 2001 ესაია 59 Bible Online

ესაია 59 - სბს–სტოკჰოლმი 2001 bible

ესაია 59

¹აჰა, არ დამოკლებულა უფლის ხელი, რომ იხსნას; და არ დამძიმებულა მისი ყური, რომ ისმინოს!

²რადგან თქვენმა ურჯულოებამ გაგმიჯნათ ერთმანეთისგან თქვენ და თქვენი ღმერთი, და თქვენმა ცოდვებმა დაფარეს მისი სახე თქვენგან, რომ არ ესმინა!

³რადგან თქვენი ხელები გასვრილია სისხლში და თქვენი თითები - ურჯულოებაში; თქვენი ბაგენი სიცრუეს ლაპარაკობენ და თქვენი ენა უსამართლობას წარმოთქვამს.

⁴არავინ ჩივის სამართლიანად, არავინ იცავს თავს ჭეშმარიტებით, იმედოვნებენ ამაოზე და ცრუობენ, ფეხმძიმდებიან უბედურებით და შობენ უსამართლობას.

⁵ასპიტის კვერცხებს ჩეკენ და ობობას ქსელს ქსოვენ. მათი კვერცხის მჭამელი მოკვდება, და გაჭყლეტილისაგან იქედნე გამოიჩეკება.

⁶მათი ქსელი გამოუსადეგარია შესამოსლად, და თავიანთი ნაკეთობით დაიფარავენ თავს. მათი საქმეები უსამართლო საქმეებია, და ძალმომრეობაა მათ ხელებში.

⁷ფეხები ბოროტისაკენ გაურბით, და უდანაშაულო სისხლის დასაღვრელად ისწრაფიან. მათი ზრახვები უკეთური ზრახვებია, ნგრევა და პარტახია მათ გზაზე.

⁸მშვიდობის გზა არ იციან მათ და სამართალი არაა მათ ნაკვალევზე. ბილიკები გაიმრუდეს, მათზე გამვლელმა არ იცის მშვიდობა.

⁹ამის გამო გაგვშორდა ჩვენ სამართალი და სიმართლე ვერ გვეწვევა ჩვენ. სინათლის იმედი გვაქვს, მაგრამ ბნელში ვართ, ველით გამობრწყინებას, მაგრამ წყვდიადში დავდივართ.

¹⁰ბრმებივით ხელით ვსინჯავთ კედელს, და, როგორც უთვალისჩინონი, ხელის ცეცებით დავდივართ. ვბორძიკობთ შუადღისას, როგორც ბინდში, უკუნეთში - როგორც მკვდრები.

¹¹დათვებივით ვღრიალებთ ყველანი და ვოხრავთ მტრედებივით. ველით სამართალს და არ ჩანს, გადარჩენას - და შორსაა ჩვენგან.

¹²რადგან გამრავლდა ჩვენი დანაშაული შენს წინაშე, და ჩვენი ცოდვები გვემოწმებიან ჩვენს წინააღმდეგ, რადგან ჩვენი დანაშაული ჩვენთანაა და ჩვენი ურჯულოება ჩვენ ვიცით:

¹³დანაშაული და თვალთმაქცობა უფლის წინაშე და განდგომა ჩვენი ღმერთისაგან, ლაპარაკი ჯანყზე და ღალატზე, ჩასახვა და გულიდან წარმოთქმა ცრუ სიტყვებისა.

¹⁴უკან დაიხია სამართალმა და შორს განდგა სიმართლე, რადგან წაბორძიკდა სიმართლე მოედანზე, და პატიოსნება ვეღარ შემოდის.

¹⁵აღარ არის ჭეშმარიტება და ბოროტისაგან გამდგარი წარტყვევნილია. დაინახა უფალმა და არ მოეწონა, არ იყო სამართალი.

¹⁶დაინახა, რომ არ იყო კაცი, და გაოცდა, რომ არ იყო დამცველი. და მიეშველა მას მისი მკლავი და მისი სიმართლე შეუდგა საყრდენად.

¹⁷და შეიმოსა სიმართლე, როგორც ჯავშანი, და ხსნის მუზარადი იყო მის თავზე. და შეიმოსა შურისგების სამოსელი ტანსაცმლად და მოისხა მოსასხამივით შურისგება.

¹⁸საზღაურის მიხედვით გადაუხდის იგი: გულისწყრომით - თავის შემჭირვებელთ, შურისგებით - თავის მტრებს, კუნძულებს სამაგიეროს მიუზღავს.

¹⁹და შეეშინდებათ დასავლეთიდან უფლის სახელისა და მზის აღმოსავლეთიდან - მისი დიდებისა, და მოვა გასაჭირი, როგორც მდინარე, უფლის სულით მოდენილი. მოდის სიონის გამომხსნელი

²⁰“და მოვა მხსნელი სიონისათვის და დანაშაულისაგან უკუქცეულთათვის იაკობში!” - ამბობს უფალი. -

²¹“და მე კი, აჰა, ჩემი აღთქმა მათთან!” - ამბობს უფალი. - “ჩემი სული, რომელიც შენზეა, და ჩემი სიტყვები, რომლებიც ჩაგიდე ბაგეში, არ განდგებიან შენი ბაგიდან, არც შენი თესლის ბაგიდან, არც შენს თესლთა თესლის ბაგიდან, ამიერიდან და უკუნისამდე!” - ამბობს უფალი.