Read სბს–სტოკჰოლმი 2001 ესაია 61 Bible Online

ესაია 61 - სბს–სტოკჰოლმი 2001 bible

ესაია 61

¹უფალი ღმერთის სულია ჩემზე, რადგან მცხო უფალმა, რომ ვახარო შეჭირვებულთ, წარმომგზავნა მე გულგატეხილთა შესახვევად, რომ გამოვუცხადო ტყვეებს თავისუფლება და პატიმართ - ბორკილების ახსნა;

²გამოვაცხადო უფლის სასურველი წელი და ჩვენი ღმერთის შურისგების დღე, რათა ვანუგეშო ყველა მგლოვიარე.

³დავადგენ, რათა სიონის მგლოვიარეთ მიეცეს გვირგვინი ნაცრის ნაცვლად, მხიარულება - გლოვის ნაცვლად, ქება-დიდების სამოსელი - სასოწარკვეთის ნაცვლად. და უწოდებენ მათ მუხებს, უფლის დარგულთ, მის სადიდებლად.

⁴და ააშენებენ ისინი ძველთაძველ ნანგრევებს, წინანდელ ნაოხარს აღადგენენ. და განაახლებენ დანგრეულ ქალაქებს, ძველ თაობათა უკაცრიელ ადგილებს.

⁵დადგებიან უცხონი და დამწყემსავენ თქვენს ცხვარს. და იქნებიან თქვენი მიწათმოქმედნი და თქვენი მევენახენი.

⁶და უფლის მღვდლებად იწოდებით, ჩვენი ღვთის მსახურნი არიანო, ითქმება თქვენზე. ხალხების დოვლათს შეჭამთ და მათი დიდებით დაიტრაბახებთ.

⁷თქვენი სირცხვილის წილ ორმაგად მოგეზღვებათ, და ნაცვლად კდემისა ილხენენ წილზე, თავიანთ მიწაზე დაიმკვიდრებენ ორმაგ წილს, და საუკუნო სიხარული ექნებათ.

⁸რადგან მე, უფალს, მიყვარს სამართალი, მძაგს ყაჩაღობა სრულადდასაწველის მორთმევისას, მე მივცემ მათ საზღაურს ჭეშმარიტებით და საუკუნო აღთქმას დავუდებ.

⁹და ცნობილი იქნება ხალხებში მათი თესლი და მათი შვილთაშვილნი - ერთა შორის, ყველა მათი მნახველი გამოიცნობს მათ, რადგან უფლის ნაკურთხი თესლია ისინი.

¹⁰სიხარულით ვიხარებ უფალში, მოილხენს ჩემი სული ჩემს ღმერთში, რადგან მან ჩამაცვა მე ხსნის ტანსაცმელი, სიმართლის სამოსლით შემმოსა მე, როგორც ნეფე იდგამს ჯიღას და როგორც სასძლო ირთვება თავისი სამკაულებით.

¹¹რადგან როგორც მიწა აღმოაცენებს მცენარეს და როგორც ბაღი ზრდის თავის ნათესს, ისე უფალი ღმერთი ამოზრდის სამართალს და ქება-დიდებას ყოველი ხალხის წინაშე.