Read სბს–სტოკჰოლმი 2001 ლევიანნი 10 Bible Online

ლევიანნი 10 - სბს–სტოკჰოლმი 2001 bible

ლევიანნი 10

¹აიღეს აარონის ძეთ, ნადაბმა და აბიჰუმ, თითოეულმა თავისი საცეცხლური და ჩადეს მათში ცეცხლი, და დაადეს მასზე საკმეველი, და მიიტანეს უფლის წინაშე უცხო ცეცხლი, რომელიც არ უბრძანებია უფალს მათთვის.

²და გამოვიდა ცეცხლი უფლისაგან და დაწვა ისინი, და დაიხოცნენ უფლის წინაშე.

³და უთხრა მოსემ აარონს: “ეს თქვა უფალმა: ‘ჩემს ახლობლებში განვიწმიდები და მთელი ხალხის წინაშე განვდიდდები.’” და დადუმდა აარონი.

⁴და მოუხმო მოსემ მიშაელს და ელცაფანს, აარონის ბიძის, ყუზიელის ძეთ, და უთხრა მათ: “მიდით, გამოიტანეთ თქვენი ძმები წმიდადან ბანაკის გარეთ.”

⁵და მივიდნენ და გამოიტანეს ისინი მათი კვართებიანად ბანაკის გარეთ, როგორც თქვა მოსემ.

⁶და უთხრა მოსემ აარონს, ელეაზარსა და ითამარს, მის ძეთ: “თავებს ნუ გაიშიშვლებთ და სამოსელს ნუ შემოიგლეჯთ, რათა არ დაიხოცოთ და არ განრისხდეს იგი მთელ თემზე. მაგრამ თქვენს ძმებს, ისრაელის მთელს სახლს შეუძლია იტიროს დამწვრები, რომლებიც დაწვა უფალმა.

⁷საკრებულო კარვის შესასვლელიდან არ გამოხვიდეთ, რომ არ დაიხოცოთ, რადგან უფლის საცხებელი ზეთია თქვენზე.” და მოიქცნენ მოსეს სიტყვისამებრ.

⁸და უთხრა უფალმა აარონს:

⁹“ღვინოსა და მაგარ სასმელებს ნუ დალევთ შენ და შენი ძენი შენთან ერთად საკრებულო კარავში შესვლისას, რათა არ დაიხოცოთ. ეს საუკუნო წესია თქვენს თაობებში,

¹⁰რათა განასხვაოთ წმიდა და საერო, უწმიდური და სუფთა.

¹¹და ასწავლოთ ისრაელის ძეთ, ყოველი წესი, რომელიც უთხრა მათ უფალმა მოსეს ხელით.”

¹²და უთხრა მოსემ აარონს, ელეაზარსა და ითამარს, მის დარჩენილ შვილებს: “აიღეთ პურეული ძღვენი, რომელიც დარჩა უფლის საცეცხლო შესაწირავიდან და ჭამეთ იგი უფუარად სამსხვერპლოსთან, რადგან წმიდათა წმიდაა ის.

¹³და ჭამეთ ის წმინდა ადგილზე, რადგან შენი წილი და შენს ძეთა წილია ეს უფლის საცეცხლო შესაწირავთაგან, რადგან ასე მებრძანა მე.

¹⁴და მკერდი შესარხეველი, და ბეჭი აღსამართავი ჭამეთ სუფთა ადგილზე შენ, შენმა ვაჟებმა და შენმა ასულებმა შენთან ერთად. რადგან შენს წილად და შენი შვილების წილადაა მოცემული ეს ისრაელის ძეთა სამშვიდობო მსხვერპლთაგან.

¹⁵აღსამართავი ბეჭი და შესარხეველი მკერდი ქონის საცეცხლო მსხვერპლებითურთ მიიტანონ შერხევის შესასრულებლად უფლის წინაშე. და იყოს შენთვის და შენს ძეთათვის შენთან საუკუნო წესად, როგორც ბრძანა უფალმა.”

¹⁶და ცოდვის ვაცს ეძებდა მოსე, მაგრამ იგი დამწვარი იყო. და განრისხდა იგი ელეაზარსა და ითამარზე, აარონის დარჩენილ ძეებზე:

¹⁷“რად არ ჭამეთ ცოდვის მსხვერპლი წმიდა ადგილზე? რადგან წმიდათა წმიდაა იგი და მოგეცათ თქვენ, რათა წარხოცოს თემის ცოდვები, მის განსაწმედად უფლის წინაშე.

¹⁸აჰა, მისი სისხლი არ იქნა შეტანილი წმიდაში. თქვენ უნდა გეჭამათ ის წმიდაში, როგორც მებრძანა მე.”

¹⁹და უთხრა აარონმა მოსეს: “აჰა, დღეს შესწირეს მათ თავიანთი ცოდვის მსხვერპლი და სრულადდასაწველი უფლის წინაშე, და ეს შემემთხვა მე. თუ შევჭამ მე ცოდვის მსხვერპლს დღეს, განა იქნება ეს სათნო უფლის თვალში?”

²⁰და მოისმინა მოსემ და მოიწონა.