Read სბს–სტოკჰოლმი 2001 ლევიანნი 14 Bible Online

ლევიანნი 14 - სბს–სტოკჰოლმი 2001 bible

ლევიანნი 14

²“ეს იქნება რჯული კეთროვანისა: მისი გასუფთავდების დღეს მიყვანილ იქნეს იგი მღვდელთან.

³და გამოვა მღვდელი ბანაკის გარეთ და, თუ დაინახავს იგი, რომ კეთროვანი განიკურნა კეთრისაგან,

⁴მაშინ უბრძანებს მღვდელი: აყვანილ იქნეს გასასუფთავებელისთვის ორი ცოცხალი ფრინველი, წმიდა, და კედრის ხე, და ძოწეულის ფერის ძაფი და უსუპი.

⁵და უბრძანებს ერთი ფრინველის დაკვლას თიხის ჭურჭელში გამდინარ წყალზე.

⁶ცოცხალ ფრინველს იგი აიყვანს კედრის ხითა და ძოწეულის ფერის ძაფითურთ, და უსუპით, და ამოავლებს მათ დაკლული ფრინველის სისხლში, რომელიც დაკლულია გამდინარ წყალზე.

⁷და მოასხურებს კეთრისაგან განწმედილს შვიდჯერ და მიიჩნევს მას სუფთად, და გაუშვებს ცოცხალ ფრინველს ველზე.

⁸“განსაწმიდავებელმა გაირეცხოს სამოსელი და გაიკრიჭოს მთელი თმა და განიბანოს წყლით, და გახდება სუფთა. და შემდეგ მივიდეს ბანაკში და დაყოს კარვის გარეთ შვიდი დღე.

⁹და მეშვიდე დღეს გაიპარსოს მთელი თმა, თავი და წვერი, და თვალთა წარბები, და მთელი თმა გაიპარსოს, და გაირეცხოს სამოსელი და განიბანოს სხეული წყლით, და გახდება სუფთა.

¹⁰“და მერვე დღეს აიყვანოს ორი უმანკო კრავი და ერთი დედალი ცხვარი, წელგამოვლილი, უმანკო, და ეფის სამი მეათედი ნაწილი წმიდა პურის ფქვილიდან პურეულ ძღვნად, ზეთში შერეული, და ერთი საწყაული ზეთისა.

¹¹და განმასუფთავებელი მღვდელი დააყენებს გასასუფთავებელ კაცს და მათ უფლის წინაშე საკრებულო კარვის შესასვლელთან.

¹²“და აიღებს მღვდელი ერთ კრავს და შესწირავს მას დანაშაულის შესაწირავად, და შეარხევს მათ უფლის წინაშე.

¹³და დაკლავს კრავს იმ ადგილზე, სადაც კლავენ ცოდვის მსხვერპლსა და სრულადდასაწველს, წმიდა ადგილზე. რადგან მსგავსად ცოდვის მსხვერპლისა, დანაშაულის ეს მსხვერპლი ეკუთვნის მღვდელს. წმიდათა წმიდაა ის.

¹⁴და აიღებს მღვდელი დანაშაულის მსხვერპლის სისხლიდან და დაადებს მას მღვდელი გასასუფთავებლის მარჯვენა ყურის ბიბილოზე და მისი მარჯვენა ხელის ცერა თითზე, და მისი მარჯვენა ფეხის ცერა თითზე.

¹⁵და აიღებს მღვდელი ზეთის საწყაულიდან და დაისხამს თავის მარცხენა ხელისგულზე,

¹⁶და ამოავლებს მარჯვენა თითს ზეთში, რომელიც მის მარცხენა ხელისგულზეა, და მოასხურებს ზეთით თავისი თითით შვიდჯერ უფლის წინაშე.

¹⁷დანარჩენი ზეთიდან, რომელიც მის ხელისგულზეა, დაადებს გასასუფთავებელს მარჯვენა ყურის ბიბილოზე, მისი მარჯვენა ხელის ცერა თითზე, და მისი მარჯვენა ფეხის ცერა თითზე, დანაშაულის მსხვერპლის სისხლზე.

¹⁸ხოლო ნარჩენი ზეთისა, რომელიც მღვდლის ხელისგულზეა, დაადოს მან გასასუფთავებელს თავზე და შეუნდობს მას უფლის წინაშე.

¹⁹“და შესწირავს მღვდელი ცოდვის მსხვერპლს და შეუნდობს გასასუფთავებელს მის უწმიდურებას. და მერე დაკლას სრულადდასაწველი.

²⁰და აღავლენს მღვდელი სრულადდასაწველს და პურეულ ძღვენს სამსხვერპლოზე. და შეუნდობს მას მღვდელი, და გასუფთავდება იგი.

²¹“თუ ღარიბია იგი და ხელი არ მიუწვდება, მაშინ აიყვანოს ერთი კრავი დანაშაულის მსხვერპლად, შესარხევად თავისი შენდობისათვის. და ეფის მეათედი ნაწილი წმიდა პურის ფქვილისა, ზეთში აზელილი, პურეულ ძღვნად, და საწყაული ზეთისა,

²²და ორი გვრიტი ან ორი მართვე მტრედისა, რაზეც მიუწვდება ხელი, და იქნება ერთი ცოდვის მსხვერპლად, ხოლო მეორე სრულადდასაწველად.

²³“და მიიტანოს ისინი თავისი გასუფთავების მერვე დღეს მღვდელთან საკრებულო კარვის შესასვლელთან, უფლის წინაშე.

²⁴და აიღებს მღვდელი დანაშაულის მსხვერპლის კრავს და ზეთის საწყაულს, და შეარხევს მას მღვდელი უფლის წინაშე.

²⁵და დაკლავს კრავს დანაშაულის მსხვერპლად, და აიღებს მღვდელი დანაშაულის მსხვერპლის სისხლს, და დაადებს გასასუფთავებელს მარჯვენა ყურის ბიბილოზე, და მისი მარჯვენა ხელის ცერზე, და მისი მარჯვენა ფეხის ცერზე.

²⁶და დაისხამს მღვდელი თავის მარცხენა ხელისგულზე.

²⁷და მოასხურებს მღვდელი თავის მარჯვენა თითით ზეთს, რომელიც მის მარცხენა ხელისგულზეა, შვიდგზის უფლის წინაშე.

²⁸და დაადებს მღვდელი ზეთს, რომელიც მის ხელისგულზეა, გასასუფთავებელს მარჯვენა ყურის ბიბილოზე და მისი მარჯვენა ხელის ცერზე, და მისი მარჯვენა ფეხის ცერზე, იმ ადგილზე, სადაც დანაშაულის მსხვერპლის სისხლია.

²⁹ნარჩენ ზეთს, რომელიც მღვდლის ხელისგულზეა, იგი დაადებს გასასუფთავებელს თავზე, მისი შენდობისათვის უფლის წინაშე.

³⁰და შესწირავს გვრიტთაგან ერთს ან მტრედის მართვეთაგან, იმათთაგან, რაზეც მიუწვდება ხელი,

³¹რაზეც მიუწვდება ხელი - ერთს ცოდვის მსხვერპლად, ხოლო მეორეს სრულადდასაწველად პურეულ ძღვენთან ერთად; და შეუნდობს მღვდელი გასასუფთავებელს უფლის წინაშე.”

³²ესაა რჯული იმისა, ვისაც კეთროვანი წყლული აქვს და ვისაც ხელი არ მიუწვდება თავის გასუფთავებისას.”

³³და უთხრა უფალმა მოსეს და აარონს:

³⁴“რაჟამს შეხვალთ ქანაანის ქვეყანაში, რომელსაც მე გაძლევთ თქვენს სამფლობელოდ, და მე მოვგვრი კეთროვან წყლულს თქვენი სამფლობელო ქვეყნის სახლს,

³⁵წავიდეს ის, ვისიცაა სახლი, და განუცხადოს მღვდელს: ‘თითქოს წყლული მეჩვენა სახლში.’

³⁶და უბრძანებს მღვდელი და დაცლიან სახლს, ვიდრე მივა იგი წყლულის სახილველად, რათა არ გაუწმიდურდეს ყოველივე, რაც სახლშია. და მერე მივა ის სახლის სახილველად.

³⁷და იხილავს წყლულს, და ნახავს, რომ წყლული სახლის კედლებზეა, მომწვანო ან მოწითალო ღრმულებად. და მათი სახე ჩაღრმავებულია კედლებში,

³⁸გავა მღვდელი სახლიდან სახლის შესასვლელისკენ და ჩაკეტავს სახლს შვიდი დღით.

³⁹მეშვიდე დღეს კვლავ მივა და, თუ დაინახავს, რომ წყლული გავრცელდა სახლის კედლებზე,

⁴⁰უბრძანებს იგი და ამოტეხენ ქვებს, რომლებზეც წყლულია, და გადაყრიან მათ ქალაქგარეთ უწმიდურ ადგილზე.

⁴¹და სახლს გადაფხეკენ შიგნიდან ირგვლივ, და გადააპნევენ მტვერს, რომელიც მოფხიკეს, ქალაქგარეთ უწმიდურ ადგილზე.

⁴²და აიღებენ სხვა ქვებს და ჩადგამენ იმ ქვათა ადგილზე და აიღებენ სხვა გასალესს, და გალესენ სახლს.

⁴³“თუ წყლული კვლავ გამოვლინდა და აყვავდა სახლში მას შემდეგ, რაც გამოტეხეს ის ქვები, გადაფხიკეს სახლი და გალესეს,

⁴⁴და მივა მღვდელი და დაინახავს, რომ წყლული გავრცელდა სახლზე, მაშინ კეთრი გესლოვანია სახლში, უწმიდურია იგი.

⁴⁵დაანგრიონ სახლი, მისი ქვები, მისი ხეები, და მთელი ბათქაში სახლისა გაიტანონ ქალაქგარეთ უწმიდურ ადგილზე.

⁴⁶“და შემსვლელი იმ სახლში იმ დღეებში, რა დროითაც ჩაჰკეტეს იგი, უწმიდურია საღამომდე.

⁴⁷მწოლიარემ იმ სახლში, უნდა გაირეცხოს თავისი სამოსელი. და მჭამელმა იმ სახლში, უნდა გაირეცხოს თავისი სამოსელი.

⁴⁸“და თუ მოვა მღვდელი და დაინახავს, რომ წყლული სახლზე არ გავრცელდა სახლის გალესვის შემდეგ, მღვდელი მიიჩნევს სახლს სუფთად, რადგან წყლული განიკურნა.

⁴⁹და აიღებს იგი სახლის გასასუფთავებლად ორ ფრინველს და კედრის ხეს, და ძოწეულის ფერის ძაფს, და უსუპს.

⁵⁰და დაკლავს ერთ ფრინველს თიხის ჭურჭელზე, გამდინარე წყალზე.

⁵¹და აიღებს კედრის ხესა და უსუპს, და ძოწეული ფერის ძაფს, და ცოცხალ ფრინველს, და ამოავლებს მათ დაკლული ფრინველის სისხლში და გამდინარე წყალში, და მოასხურებს სახლს შვიდგზის.

⁵²და გაასუფთავებს სახლს ფრინველის სისხლით და გამდინარე წყლით, და ცოცხალი ფრინველით, და კედრის ხით, და უსუპით და ძოწეულის ფერის ძაფით.

⁵³და გაუშვებს ცოცხალ ფრინველს ქალაქგარეთ ველზე, და შეუნდობს სახლს, და გასუფთავდება იგი.”

⁵⁴ეს არის რჯული კეთრისა და ქეცისა და ყოველი წყლულისა.

⁵⁵და სამოსლისა და სახლის კეთრისა.

⁵⁶სიმსივნისა, ქეცისა და ლაქისა.

⁵⁷რათა მიეთითოს, როდის არის უწმიდურება და როდის სისუფთავე. ესაა კეთრის რჯული.