Read სბს–სტოკჰოლმი 2001 ლევიანნი 20 Bible Online

ლევიანნი 20 - სბს–სტოკჰოლმი 2001 bible

ლევიანნი 20

¹და ელაპარაკა უფალი მოსეს:

²“უთხარი ისრაელის ძეთ: ‘ყოველი კაცი ისრაელის ძეთაგან და ისრაელში შეხიზნულ ხიზანთაგან, რომელიც მისცემს თავის შვილებს მოლეხს, სიკვდილით მოკვდება. ქვეყნის ხალხმა ქვით ჩაქოლოს იგი.

³და მე მივაპყრობ ჩემს სახეს იმ კაცს და მოვსპობ მას მისი ხალხის გარემოდან, რადგან მან მისცა თავისი თესლიდან მოლეხს, რათა გაეუწმიდურებინა ჩემი საწმიდარი და წაებილწა ჩემი წმიდა სახელი.

⁴და თუ ხალხი ქვეყნისა აარიდებს თვალს იმ კაცს, როცა იგი აძლევს თავისი თესლიდან მოლეხს, და არ მოკლავენ მას,

⁵მე მივაპყრობ ჩემს სახეს იმ კაცს და მის მოდგმას, და მოვსპობ მას და ყველას, ვინც მრუშობს მის კვალდაკვალ, სამრუშოდ რომ დადიან მოლეხის კვალდაკვალ, მათი ხალხის გარემოდან.

⁶“‘და მას, რომელიც მიმართავს მესულთანეებს და ჯადოსნებს მათ კვალდაკვალ სამრუშოდ, მე მივაპყრობ ჩემს სახეს და მოვსპობ მისი ხალხის გარემოდან.

⁷“‘განიწმიდენით და იყავით წმიდა, რადგან მე ვარ უფალი, ღმერთი თქვენი.

⁸და დაიცავით ჩემი წესები და აღასრულეთ ისინი, რამეთუ მე ვარ უფალი, განმწმედელი თქვენი.

⁹“‘თუ ვინმემ დასწყევლოს თავისი მამა და თავისი დედა, სიკვდილით მოკვდეს. მამამისი და დედამისი დაწყევლა მან - მასზეა მისი სისხლი.

¹⁰“‘ვინც იმრუშებს ქმრიან ქალთან, ვინც იმრუშებს თავისი მოყვასის ცოლთან, სიკვდილით უნდა მოკვდნენ მრუში მამაკაციც და მრუში დედაკაციც.

¹¹“‘ვინც დაწვება თავისი მამის ცოლთან, თავისი მამის სიშიშვლე ახადა მან. სიკვდილით უნდა მოკვდნენ ორივე.ნი. მათი სისხლი მათზეა.

¹²“‘ვინც დაწვება თავის რძალთან, სიკვდილით უნდა მოკვდნენ ორივენი. რაც მათ ქნეს, სისაძაგლეა. მათზეა მათი სისხლი.

¹³“‘ვინც დაწვება მამაკაცთან, როგორც წვებიან ქალთან, სისაძაგლე ქნეს ორთავემ. სიკვდილით უნდა მოკვდნენ ისინი - მათი სისხლი მათზეა.

¹⁴“‘თუ ვინმემ შეირთოს ცოლად დედა-შვილი, ეს ურჯულოებაა. ცეცხლში დაწვით იგი მათთან ერთად, რათა არ იყოს ურჯულოება თქვენს შორის.

¹⁵“‘ვინც დაეცემა პირუტყვთან, სიკვდილით მოკვდეს და ის პირუტყვიც მოჰკალით.

¹⁶“‘ქალი რომ მივიდეს რომელიმე პირუტყვთან, რათა დაეცეს მასთან, მოკალით ქალიც და პირუტყვიც, სიკვდილით მოკვდნენ ისინი - მათზეა მათი სისხლი.

¹⁷“‘ვინმემ რომ შეირთოს თავისი და - ასული თავისი მამისა, ან ასული თავისი დედისა - და დაინახოს მისი სიშიშვლე და ქალმაც ნახოს მისი სიშიშვლე, სიბილწეა ეს. და მოისპონ ისინი თავიანთი ხალხის ძეთა თვალწინ. სიშიშვლე თავისი დისა ახადა მან. თავის ცოდვას იტვირთავს იგი.

¹⁸“‘ვინც დაწვება ცოლთან მისი თვიურის დროს და ახდის მის სიშიშვლეს, რაკი მან გააშიშვლა მისი წყარო, ხოლო ქალმა გამოაჩინა თავისი სისხლის წყარო, მოისპონ ორივე თავიანთი ხალხის გარემოდან.

¹⁹“‘სიშიშვლე დედის ან მამის დისა არავინ ახადოს, რადგან თავის ხორცს აშიშვლებს, თავიანთ ცოდვას იტვირთავენ ისინი.

²⁰“‘ვინც დაწვება თავისი ბიძის ცოლთან, მან თავისი ბიძის სიშიშვლე ახადა. თავიანთ ცოდვას იტვირთავენ, უშვილონი დაიხოცებიან.

²¹“‘ვინმემ რომ შეირთოს თავისი ძმის ცოლი, ეს შებილწვაა, სიშიშვლე თავისი ძმისა ახადა მან - უშვილონი იქნებიან.

²²“‘დაიცავით ყოველი ჩემი წესი და ყოველი ჩემი სამართალი, და აღასრულეთ ისინი, და არ ამოგანთხევთ თქვენ ქვეყანა, სადაც მე მიგიყვანთ საცხოვრებლად.

²³არ მოიქცეთ იმ ხალხის წესებისამებრ, რომელსაც მე ვდევნი თქვენგან, რადგან ყოველივე ეს გააკეთეს მათ და მძაგს ისინი.

²⁴გითხარით: “თქვენ დაიმკვიდრებთ მათ მიწას და მე მოგცემთ მას თქვენ სამკვიდროდ, ქვეყანას სადაც მოედინება რძე და თაფლი.” მე ვარ უფალი, ღმერთი თქვენი, რომელმაც გამოგარჩიე თქვენ ხალხთაგან.

²⁵“‘განასხვავეთ წმიდა და უწმიდური პირუტყვი და უწმიდური და წმიდა ფრინველი და არ შებილწოთ თქვენი სულები პირუტყვით და ფრინველით, და იმით, რაც ქვემძრომობს დედამიწაზე, რომელიც მე გამოვაცალკევე, როგორც უწმიდური.

²⁶იყავით ჩემთვის წმიდები, რადგან წმიდა ვარ მე, უფალი, და მე გამოგაცალკევეთ ხალხთაგან, რათა ჩემი იყოთ.

²⁷“‘მამაკაცი ან დედაკაცი, თუ აღმოჩნდეს მესულთანე ან ჯადოქარი, სიკვდილით მოკვდეს: ქვებით ჩაიქოლონ ისინი და მათზე იქნება მათი სისხლი.’”