Read სბს–სტოკჰოლმი 2001 ლევიანნი 27 Bible Online

ლევიანნი 27 - სბს–სტოკჰოლმი 2001 bible

ლევიანნი 27

¹და უთხრა უფალმა მოსეს:

²“ელაპარაკე ისრაელის ძეთ და უთხარი მათ: ‘თუ ვინმე დადებს ძნელ აღთქმას შენი შეფასებისამებრ შეაფასე უფლისათვის აღთქმული სული.

³შენი შეფასება იყოს: ოცი წლიდან სამოც წლამდე მამაკაცისთვის ორმოცდაათი შეკელი ვერცხლისა, საწმიდრის შეკელით.

⁴და თუ ქალია, შენი შეფასება იყოს ოცდაათი შეკელი.

⁵თუ ხუთი წლიდან ოც წლამდეა, შენი შეფასება მამაკაცისთვის იყოს ოცი შეკელი, ხოლო ქალისთვის ათი შეკელი.

⁶და თუ ერთი თვიდან ხუთ წლამდეა, შენი შეფასება ვაჟისათვის იყოს ვერცხლის ხუთი შეკელი, ხოლო ქალისთვის ვერცხლის სამი შეკელი.

⁷და თუ სამოცი წლისაა, ან უფრო მეტის, თუ მამაკაცია, შენი შეფასება იყოს თხუთმეტი შეკელი, ქალისთვის - ათი შეკელი.

⁸თუ ღარიბია და არ ძალუძს გაცემა შენი შეფასების მიხედვით, წარუდგინონ მღვდელს და შეაფასებს. აღთქმის დამდების ქონების შესაბამისად შეაფასოს მღვდელმა.

⁹“‘თუ ეს პირუტყვია, რომელთაგან სწირავენ მსხვერპლად უფალს, ყოველი, რასაც მისცემს მისგან უფალს, წმიდა იყოს.

¹⁰არ შეიძლება გაიცვალოს და არც შეიცვალოს კარგი ცუდით, ან ცუდი კარგით; და თუ შეცვლის, შეიცვალოს პირუტყვი პირუტყვით, მაშინ იგი და მისი სანაცვლო წმიდა იყოს.

¹¹თუ ეს რომელიმე უწმიდური პირუტყვია, რომელსაც არ სწირავენ მსხვერპლად უფალს, წარუდგინოს პირუტყვი მღვდელს,

¹²და შეაფასოს მან, კარგია თუ ცუდი, და როგორც შეაფასებს, ისე იყოს.

¹³თუ გამომსყიდველი გამოისყიდის მას, დაუმატოს მეხუთედი ნაწილი შენს შეფასებას.

¹⁴“‘თუ ვინმე შესწირავს თავის სახლს სიწმიდედ უფალს, მღვდელმა შეაფასოს, კარგია თუ ცუდი; როგორც შეაფასებს მას მღვდელი, ისე იყოს.

¹⁵თუ შემწირველი თავის სახლს გამოისყიდის, დაუმატოს მეხუთედი ნაწილი ვერცხლისა შენს შეფასებას, და მისი იქნება.

¹⁶“‘თუ ვინმე თავისი საკუთარი სამფლობელოდან ყანას მიუძღვნის უფალს, შენი შეფასება მისი ნათესის ზომის მიხედვით იყოს: ერთი ღომორი ქერის ნათესისთვის ვერცხლის ორმოცდაათი შეკელი.

¹⁷თუ ვერძობის წლის წინ შესწირავს ვინმე თავის ყანას, მოხდეს შენი შეფასებისამებრ.

¹⁸თუ ვერძობის შემდეგ შესწირავს ვინმე თავის ყანას, მღვდელმა ვერცხლი გაიანგარიშოს ვერძობის წლამდე დარჩენილი წლების მიხედვით და გამოიქვითება მისი შეფასებიდან.

¹⁹და თუ მისი შემწირველი ყანას გამოსყიდვით გამოისყიდის, დაუმატოს ვერცხლის მეხუთედი ნაწილი შენს შეფასებას და მას დარჩება.

²⁰თუ არ გამოისყიდა ყანა, ან თუ მიჰყიდა ყანა სხვა კაცს, მერე ვეღარ გამოისყიდის

²¹ეს ყანა იქნება, ვერძობის წელში მისი გასვლის ჟამს, უფლის სიწმიდედ, როგორც მიძღვნილი ყანა; მღვდელს ექნება ის სამფლობელოდ.

²²“‘თუ ნაყიდ ყანას, რომელიც არაა მისი მფლობელობის ყანათაგან, ვინმე მიუძღვნის უფალს,

²³მაშინ მღვდელმა გამოუანგარიშოს მას შეფასების ოდენობა ვერძობის წლამდე, და მისცეს ვერცხლი ამ შეფასების მიხედვით იმავე დღეს, როგორც სიწმიდე უფლისა.

²⁴ვერძობის წელს კი უბრუნდება ყანა იმას, ვისგანაც იყიდა, ვისაც ეკუთვნის იმ მიწის მფლობელობა.

²⁵ყოველი შენი შეფასება იყოს წმიდის შეკელით, ოცი გერა იყოს შეკელში.

²⁶“‘ხოლო პირველმოგებული საქონლისაგან, რომელიც პირმშოობით უფალს ეკუთვნის, მისი მიძღვნა არავის არ შეუძლია: ხარი ან კრავი უფლისაა.

²⁷თუ ეს უწმიდური პირუტყვიდანაა, მაშინ გამოსყიდული იქნება შენი შეფასებისამებრ და დაემატოს მას მისი მეხუთედი ნაწილი. და თუ არ გამოისყიდება, მაშინ გაიყიდოს შენი შეფასებით.

²⁸“‘ხოლო ყოველი აღკვეთილი, რასაც აღკვეთს კაცი უფლისათვის თავისი საკუთრებიდან: ადამიანიდან, საქონლიდან, თუ თავისი სამფლობელო ყანიდან, არ გაიყიდება და არც გამოისყიდება. ყოველი აღკვეთილი ყოვლად წმიდაა უფლისათვის.

²⁹“‘ყოველი აღკვეთილი, რაც აღიკვეთება ადამიანისაგან, არ გამოისყიდება; სიკვდილით უნდა მოკვდეს.

³⁰“‘და ყოველი მეათედი მიწიდან: მიწის თესლისაგან, ხის ნაყოფისაგან, უფლისაა ის. ეს სიწმიდეა უფლისა.

³¹თუ ვინმე თავისი მეათედიდან გამოსყიდვით გამოისყიდის, მაშინ მიუმატოს მას მეხუთედი ნაწილი.

³²ყოველი მეათედი მსხვილფეხა და წვრილფეხა საქონლისა, ყოველი მეათე კვერთხქვეშ რომ გადის, უფლის სიწმიდეა,

³³არ გაირჩეს კარგი და ცუდი, და არ შეიცვალოს იგი. თუ ვინმე შეცვლით შეცვლის მას, ისიც და მისი სანაცვლოც წმიდა იქნება და არ გამოისყიდება’”.

³⁴ესენია მცნებანი, რომელნიც ამცნო უფალმა მოსეს ისრაელის ძეთათვის სინაის მთაზე.